VLEN: Ali Ahmeti, përmes krushkut, ka marrë kredi prej 5 milionë eurosh nga “Alta Banka Beograd” (VIDEO)
Të nderuar përfaqësues të mediave,
Sot, para opinionit publik, prezantojmë faktin kyç që e lidh drejtpërdrejt rrethin më të afërt familjar të Ali Ahmetit me biznesmenin kontrovers serb, Davor Macura, dhe bankën e Beogradit “Alta Banka”.
Ndërsa Ali Ahmeti dhe udhëheqësia e BDI-së për vite me radhë i kanë shitur publikut patriotizëm të rremë, larg syve të opinionit, rrjeti i tyre familjar i biznesit ka lidhur marrëveshje milionëshe drejtpërdrejt në Beograd. Sot, kur pronari i “Alta Bankës”, Davor Macura, ndodhet në paraburgim në Serbi dhe kur Banka Popullore u detyrua të vendosë administrim të përkohshëm për të mbrojtur sistemin bankar të vendit, gjurmët e parave çojnë drejtpërdrejt në Zajaz dhe Kërçovë.
Në qendër të këtij operacioni ndodhet kompania kërçovare “AS Senjak”, në pronësi të Selaudin Arifit, krushkut të Ali Ahmetit, e cila tashmë është e njohur për opinionin si partnere e nipit të tij, Drin Ahmeti, në blerjen milionëshe të “Soravisë”.
Më 9 qershor 2025, pikërisht në kohën kur po përgatitej hyrja e bankës serbe “Alta Banka” në Maqedoninë e Veriut, një kompani ku bashkëpronar është pikërisht “AS Senjak”, në pronësi të krushkut të Ahmetit, merr një kredi prej 5 milionë eurosh, drejtpërdrejt nga selia qendrore e “Alta Bankës” në Beograd!
Publikisht e pyesim Ali Ahmetin dhe udhëheqësinë e BDI-së:
• Sipas cilës logjikë ekonomike dhe për çfarë meritash banka e Davor Macurës nga Beogradi i jep 5 milionë euro kapital të freskët një kompanie të lidhur drejtpërdrejt me familjen e Ahmetit?
• Si është e mundur që një bankë nga Serbia, pikërisht në momentin kur po kërkonte mënyrën për të hyrë në tregun maqedonas dhe për të blerë Stopanska Bankën e Manastirit, të financojë me shuma milionëshe kompani të krushkut të liderit të partisë, kuadrot e së cilës, Fatmir Besimi, Bujar Osmani dhe Artan Grubi, për vite me radhë kontrollonin rrjedhat financiare dhe shtetërore?
• A mos vallë, përmes kësaj kredie prej 5 milionë eurosh, të paguar nga Beogradi për rrjetin familjar të Ahmetit, Davor Macura e ka paguar në të vërtetë mbështetjen politike dhe e ka blerë hyrjen në sistemin bankar të Maqedonisë?
Kjo nuk është një marrëveshje e zakonshme biznesi, por një skemë klasike e korrupsionit politiko-financiar.
Prandaj, sot u bëjmë thirrje publike Prokurorisë Publike dhe Drejtorisë së Inteligjencës Financiare që menjëherë të hapin hetim për transaksionet ndërkombëtare të datës 9 qershor 2025 dhe të shqyrtojnë rrethanat dhe kushtet në të cilat është miratuar kjo kredi nga Beogradi, me çfarë garancie është mbuluar dhe në llogaritë e kujt në Maqedoni kanë përfunduar pesë milionë eurot e “Alta Bankës”?
Ali Ahmetit dhe BDI-së u bëjmë me dije që të mos fshihen pas parullave boshe politike, sepse në konferencën e ardhshme për shtyp do të publikojmë se çfarë ka ndodhur saktësisht vetëm tre muaj pas transferimit të këtyre 5 milionë eurove nga Beogradi!
VIDEO:
/ms
