Delegacioni i Myftinisë së Kërçovës në vizitë në xhaminë “Kërçova” në Füllinsdorf të Zvicrës

Mbrëmë, delegacioni i Myftinisë së Kërçovës, i udhëhequr nga Myftiu Qamil ef. Rushiti, qëndroi për vizitë në Xhaminë “Kërçova” në Füllinsdorf të Zvicrës, ku u mirëprit përzemërsisht nga kryetari i Këshillit të Xhamisë, z. Enver Ibraimi, imami Vullnet ef. Iljazi, anëtarët e Këshillit, xhemati dhe dashamirë të shumtë, të cilët kishin ardhur edhe nga qytete të tjera të Zvicrës.

Pas faljes së namazit të Jacisë, programi filloi me leximin e disa ajeteve kuranore nga referenti i Myftinisë, Bajram ef. Karamaleski. Më pas, të pranishmit i përshëndeti sekretari i Myftinisë, Xhemail Ahmedi, ndërsa fjalën kryesore e mbajti Myftiu i Kërçovës, Qamil ef. Rushiti.

Në fjalën e tij, Myftiu uroi kryesinë e Xhamisë për mandatin e ri, duke theksuar rëndësinë e angazhimit të vazhdueshëm, përkushtimit dhe përgjegjësisë në mirëmbajtjen, zhvillimin dhe përparimin e xhamive dhe institucioneve fetare. Ai vlerësoi lart kontributin e bashkatdhetarëve tanë në diasporë, të cilët, krahas ruajtjes së vlerave fetare e kombëtare, vazhdojnë të jenë mbështetës të rëndësishëm të institucioneve dhe projekteve në vendlindje.

Në një atmosferë të ngrohtë e vëllazërore, Myftiu i informoi drejtpërdrejt anëtarët e Këshillit dhe xhematin për funksionimin e Myftinisë së Kërçovës, rolin dhe përgjegjësitë e imamëve, si dhe veprimtarinë fetare, edukative dhe institucionale që zhvillohet në kuadër të saj.

Ky takim shërbeu edhe si një mundësi e çmuar për forcimin e lidhjeve dhe thellimin e bashkëpunimit ndërmjet Myftinisë së Kërçovës dhe bashkatdhetarëve tanë që jetojnë e veprojnë në Zvicër.
Allahu i Madhërishëm i shpërbleftë kryesinë, imamin dhe xhematin e Xhamisë “Kërçova” për mikpritjen e ngrohtë, përkushtimin dhe kontributin e tyre të vazhdueshëm! Allahu u dhëntë shëndet, bereqet dhe suksese në çdo punë të mirë!

/tvgurra