Mësues Selim Adili – një jetë në shërbim të dijes dhe të fjalës shqipe !

Ka njerëz që kalojnë nëpër jetë dhe ka njerëz që lënë gjurmë pas vetes. Njëri prej tyre ishte Selim Adili (1929–2019), mësuesi dhe poeti nga Sërbica (Kastrioti) i Kërçovës. Ai i përkiste atij brezi arsimtarësh që, në kohë të vështira, nuk u kursyen për të mbajtur gjallë shkollën dhe mësimin në gjuhën shqipe.

Më 1 dhjetor 1945 nisi rrugëtimin e tij si mësues në Premkë. Më pas shërbeu në disa shkolla të trevës së Kërçovës, duke edukuar breza të tërë nxënësish.
Por Selim Adili nuk ishte vetëm mësues. Ai ishte edhe poet, një njeri që përmes vargut i këndoi fëmijërisë, vendlindjes, historisë dhe dashurisë për gjuhën shqipe.

Krijimtarinë letrare e filloi më 1953. Është autor i 28 veprave të botuara. Ndër veprat e tij janë:
Gjumë në katin e shtatë
Fryn një erë
Nëpër shekuj – nëpër prita
Dy gjelat
Zogjtë e Kërçovës
…si dhe shumë krijime të tjera letrare që dëshmojnë për përkushtimin e tij ndaj letërsisë shqipe, veçanërisht asaj për fëmijë.

Edhe pse një pjesë të jetës e kaloi në Amerikë, zemra dhe kujtesa e tij mbetën të lidhura me vendlindjen.
Më 27 mars të vitit 2019, në Çikago, u shua jeta e tij, ndërsa varrimi i të ndjerit u bë në vendlindje, në varrezat e fshatit në Sërbicë të komunës së Kërçovës.

Mësues Selimi ndërroi jetë, por JO kujtimi për punën dhe krijimtarinë që la pas.
Një mësues që mbolli dije. Një poet që la vepra. Një bir i Kërçovës që meriton të mos harrohet!
Le ta kujtojmë dhe ta nderojmë veprën e tij!
Shkruan: Dr. sc. Kujtim Kasami

/ms