Myftinia e BFI – Kërçovë realizoi seminari trajnues për Imamë, Hatibë dhe Vaizë

Sot, më 12 nëntor 2026, në Kërçovë u realizua Seminari Trajnues për Imamë, Hatibë dhe Vaizë, i organizuar nën përkujdesjen e Kryetarit të Bashkësisë Fetare Islame të RMV-së, Reisul Ulema H. Hfz. Shaqir ef. Fetahu, në kuadër të bashkëpunimit institucional ndërmjet BFI-së së RMV-së dhe Ministrisë për Çështje Islame, Thirrje dhe Udhëzim të Mbretërisë së Arabisë Saudite.
Ky aktivitet me karakter fetar, edukativ dhe shkencor u zhvillua nën mikpritjen e Myftiut të Kërçovës, H. Qamil ef. Rushiti, me angazhimin dhe përkujdesjen organizative të administratës së Myftinisë së Kërçovës.

Programi filloi me leximin e ajeteve kuranore nga Muhamed ef. Gaziu, imam pranë Myftinisë së Prilepit.
Në fjalën e tij përshëndetëse, Myftiu i Kërçovës, H. Qamil ef. Rushiti, u dëshiroi mirëseardhje ligjëruesit, mysafirëve dhe të gjithë pjesëmarrësve, duke theksuar rëndësinë e organizimit të seminareve të këtilla për ngritjen profesionale, pasurimin e njohurive fetare dhe avancimin e misionit të imamëve në shoqëri.
Me këtë rast, Myftiu shprehu falënderime dhe mirënjohje të veçantë ndaj Rijasetit të BFI-së dhe Reisul Ulemasë, H. Hfz. Shaqir ef. Fetahu, për besimin e dhënë dhe përzgjedhjen e Kërçovës si nikoqire të këtij aktiviteti me rëndësi të veçantë për kuadrin fetar.

Në seminar morën pjesë Myftiu i Prilepit, H. Shefket ef. Imeri, përfaqësues dhe imamë nga Myftinia e Dibrës, drejtorë të sektorëve të Rijasetit të BFI-së, si dhe një numër i konsiderueshëm imamësh, hatibësh dhe vaizësh nga myftinitë pjesëmarrëse.
Ligjërues i seminarit ishte Prof. Dr. Shejh Muhammed bin Hassan bin Abdullah Al-Shehri, i cili trajtoi temën:
“Akideja e Tahaviut e Imam Ebu Xhafer et-Tahaviut el-Hanefi”.

Gjatë ligjëratës u shtjelluan parimet themelore të besimit islam, rëndësia e kuptimit dhe interpretimit të drejtë të tyre, si dhe vlera e mbështetjes në trashëgiminë e pasur shkencore dhe teologjike të dijetarëve të mirënjohur të traditës islame.
Seminari përbënte një mundësi të çmuar për thellimin e njohurive, shkëmbimin e përvojave dhe forcimin e bashkëpunimit ndërmjet kuadrove fetare, duke kontribuar në ngritjen e cilësisë së shërbimit fetar, edukativ dhe shoqëror.

Në përfundim, Myftinia e Kërçovës shpreh mirënjohje për të gjithë ata që kontribuuan në organizimin dhe mbarëvajtjen e këtij seminari, në veçanti për ligjëruesin e nderuar, përfaqësuesit e Rijasetit të BFI-së, myftinjtë dhe të gjithë imamët pjesëmarrës.
Allahu i Madhërishëm i shpërbleftë të gjithë për kontributin e dhënë, ua shtoftë diturinë e dobishme dhe i begatoftë përpjekjet e tyre në shërbim të fesë, besimtarëve dhe shoqërisë!
Me respekt,
Myftinia e BFI-së – Kërçovë

/ms