Pse në Kërçovë promovohen antivlerat ? Shkruan Albert Sadiku
Një shoqëri që promovon antivlerat dhe hesht përballë njerëzve me vlera, e dëmton të ardhmen e vet.
Çuditem dhe, sinqerisht, më duket tragjikomike ajo që po ndodh në rrethin ku jetojmë!
Jo vetëm sot, por edhe në retrospektivë, asnjëherë nuk arritët të krijoni mekanizma për t’i luftuar keqbërësit, dëmtuesit dhe zullumqarët. Përkundrazi, sot po i lartësoni, po i promovoni dhe po i paraqitni si modele për shoqërinë.
Ore, a jeni normalë? Ku jetoni ju? Çfarë mesazhi po u përcillni fëmijëve tuaj dhe brezave që vijnë, kur promovoni njerëz që në opinionin publik shoqërohen me akuza dhe pretendime tejet shqetësuese për sjellje dhe abuzime?
A e dini sa njerëz me vlera ka Kërçova? Sa intelektualë, doktorë shkencash, profesionistë, njerëz me arritje akademike, zbulime shkencore dhe kontribute të jashtëzakonshme për shoqërinë?
Pse nuk i promovoni ata? Pse nuk krijoni hapësirë për njerëzit që ndërtojnë, kontribojnë dhe i japin dinjitet këtij qyteti?
Asnjëherë nuk ngritët debate konstruktive, asnjëherë nuk i vendosët në qendër vlerat, meritokracinë dhe interesin e përgjithshëm. Por, sa herë afrohen zgjedhjet, rrjetet sociale mbushen me promovime të tilla, sikur shoqërisë sonë t’i kenë mbaruar njerëzit me vlera.
Kërçova ka pasuri të jashtëzakonshme njerëzore. Ka njerëz që meritojnë respekt, vëmendje dhe promovim. Mos e fyeni dinjitetin e tyre duke i zëvendësuar vlerat me antivlera.
Turp është kur një shoqëri nuk arrin t’i dallojë dhe t’i vlerësojë njerëzit që e meritojnë!
/ms
