Miliona euro shkuan kot, prap do të ndërtohet spital i ri në Kërçovë !

Pas shumë zvarritjeve, dje Ministria e Shëndetësisë së bashku me një delegacion nga Banka Botërore e kanë prezantuar konceptin për ndërtimin e spitalit të ri në Kërçovë, investim prej 22 milionë eurove, transmeton Portalb.mk.

Nga Ministria e Shëndetësisë thonë se spitali i ri do të sigurojë kushte moderne për diagnostikim, trajtim dhe mjekësi urgjente, sisteme moderne për gazra mjekësorë dhe zgjidhje me efikasitet energjetik, mbrojtje shëndetësore më cilësore dhe më të qasshme për banorët e Kërçovës dhe vendbanimeve përreth.

“Është koha që Kërçova të marrë një zgjidhje të përhershme dhe funksionale. Qytetarët meritojnë kujdes shëndetësor të sigurt në qytetin e tyre, ndërsa punonjësit shëndetësorë kushte moderne për punë”, theksoi zëvendësministri Jovica Andovski.

Kjo vjen një vit më pas pasi më 15 korrik 2025 Qeveria e Maqedonisë vendosi për ndërtimin e Spitalit të ri në Kërçovë.
Kujtojmë që një objekti i spitalit të ri të Kërçovës, filloi të ndërtohet që nga vitet e 90-ta. Kërçovarët vazhdojnë t’i marrin shërbimet shëndetësore në hapësirat e spitalit të vjetër, pavarësisht se autoritetet lokale dhe qendrore disa herë u kanë premtuar spital me kushte moderne.

Spitali, i cili do të duhej t’u shërbente pacientëve, sot është bërë vendstrehim për qentë endacakë. Në vend të tij, do të ndërtohet objekt tjetër i ri nga themeli.

/portalb