Kryetari Aleksandar Jovanoski: Kërçova po merr një spital bashkëkohor të ri

Sot, së bashku me zëvendësministrin e Shëndetësisë Jovica Andovski, drejtoreshën e Spitalit të Përgjithshëm të Kërçovës dr. Maja Cvetanovska Trajkoska dhe një delegacion të Bankës Botërore, u shqyrtua koncepti për ndërtimin e një spitali të ri dhe bashkëkohor në Kërçovë.

Ky projekt paraqet një investim me rëndësi të madhe për Kërçovën dhe të gjithë rajonin. Investimi i planifikuar në vlerë prej 1,38 miliardë denarësh, respektivisht 22,5 milionë euro, synon të sjellë kushte moderne për diagnostikim, trajtim dhe mjekësi urgjente, si dhe një kujdes shëndetësor më cilësor dhe më të qasshëm për qytetarët.

Mirënjohje e sinqertë iu drejtua Ministrisë së Shëndetësisë dhe zëvendësministrit Jovica Andovski për angazhimin dhe mbështetjen që ky projekt i rëndësishëm të ecë përpara, si dhe përfaqësuesve të Bankës Botërore për gatishmërinë e tyre që të jenë partnerë në krijimin e kushteve më të mira për kujdesin shëndetësor në Kërçovë.

Mirënjohje u shpreh edhe ndaj drejtuesve dhe punonjësve shëndetësorë të Spitalit të Përgjithshëm të Kërçovës, të cilët çdo ditë kujdesen për shëndetin e qytetarëve dhe më së miri e njohin nevojën që Kërçova më në fund të ketë një spital bashkëkohor.

Komuna e Kërçovës mbetet e përkushtuar fuqishëm ndaj realizimit të këtij projekti, me qëllim që qytetarët të marrin kujdes shëndetësor të sigurt dhe cilësor në qytetin e tyre, ndërsa punonjësit shëndetësorë të kenë kushte moderne dhe dinjitoze për punë.

Vetëm përmes punës së përbashkët, bashkëpunimit institucional dhe përkushtimit të vërtetë mund të realizohen projektet që Kërçova i meriton.
Kërçova ka pritur gjatë për spitalin e ri – është koha që ai të bëhet realitet për gjeneratat e tashme dhe të ardhshme.

/ms