Italia ofron jetesë falas për plot 10 vite – shtëpi pranë detit dhe në fshatra malorë, ja kush mund të aplikojë ?

Të jetosh në një fshat piktoresk italian, pranë maleve apo detit, pa paguar qira për dhjetë vite. Kjo është mundësia që synon të ofrojë programi “Ripopola Calabria”, përmes të cilit rajoni italian i Kalabrisë kërkon të tërheqë banorë të rinj dhe të rigjallërojë komunat që përballen me shpopullim.

Sipas informacionit të paraqitur për programin, faza e parë përfshin 50 prona në 26 komuna. Shtëpitë dhe apartamentet do të rikonstruktohen me financim rajonal, ndërsa kandidatët e përzgjedhur do të mund t’i shfrytëzojnë falas për një periudhë dhjetëvjeçare.

Pa qira, por jo në pronësi
Ndryshe nga nismat për shitjen e shtëpive me çmim simbolik prej një euroje, ky program nuk parashikon që banorët e rinj t’i blejnë pronat apo të mbulojnë shpenzimet e rinovimit.

Megjithatë, kushti kryesor është që përfituesit të zhvendosen në Kalabri dhe ta regjistrojnë e ta mbajnë aty vendbanimin gjatë gjithë periudhës së shfrytëzimit. Pronat nuk do të kalojnë në pronësinë e tyre.

Për rikonstruktimin e një prone parashikohet financim deri në 280 mijë euro. Periudha dhjetëvjeçare e banimit falas do të nisë pasi të përfundojnë punimet dhe banesa të jetë gati për t’u përdorur.

Pas përfundimit të kësaj periudhe mund të shqyrtohen mundësi për vazhdimin e qëndrimit ose blerjen e pronës, por kushtet konkrete mbeten për t’u përcaktuar.

Nga fshatrat mesjetare te zonat pranë detit
Oferta përfshin apartamente dhe shtëpi të madhësive të ndryshme. Ndër pronat e përmendura janë një apartament katërdhomësh prej 135 metrash katrorë në Torre di Ruggiero, një shtëpi me kopsht dhe pamje nga malet në San Mango d’Aquino, si dhe një pronë prej 85 metrash katrorë në Cessaniti, pranë plazheve të Detit Tirren.

Kush mund të aplikojë?
Sipas kushteve të përshkruara, programi u drejtohet shtetasve italianë, shtetasve të vendeve të tjera të Bashkimit Evropian dhe shtetasve të vendeve të treta që kanë leje të rregullt qëndrimi në Itali.

Kandidatët duhet të jenë madhorë, të kenë jetuar të paktën tre vite jashtë Kalabrisë dhe të angazhohen për t’u vendosur në rajon për dhjetë vite.

Përparësi parashikohet të kenë çiftet e reja të martuara, familjet me fëmijë, prindërit e vetëm, personat që punojnë në distancë, të vetëpunësuarit dhe të kthyerit nga jashtë vendit.
Banesat do të përdoren vetëm për banim. Dhënia e tyre me qira për turistë apo shfrytëzimi për veprimtari biznesi nuk do të lejohet.

/ts