Moment historik: Qyteti i Kërçovës bëhet pjesë e rrjetit evropian për mbrojtjen e lumenjve

Kërçova ishte nikoqire e një delegacioni zyrtar nga Drejtoria e Përgjithshme për Menaxhimin e Ujërave e Bashkimit Evropian dhe programi DALIA, ku u konfirmua mbështetja për zbatimin e projektit të ri evropian „ÇISTO-Kërçova“ – Edukim dhe veprime të udhëhequra nga komuniteti për lumenj më të pastër dhe pa mbeturina.

Siç njoftuan nga Komuna e Kërçovës, bëhet fjalë për një projekt në kuadër të programit DALIA – Horizon Europe, të financuar nga Bashkimi Evropian, ndërsa Kërçova është komuna e vetme nga rajoni që ka arritur të bëhet pjesë e kësaj nisme evropiane.

“Ky është një moment historik për Kërçovën. Po bëhemi pjesë e rrjetit evropian të zgjidhjeve inovative për lumenj të pastër. Qëllimi ynë është të ndërtojmë një model që do ta forcojë komunitetin dhe do të sigurojë mbrojtje afatgjatë të lumenjve.

Për më tepër, zona jonë është e pasur me vlera unike natyrore – lugina e lumit Treska dhe Beliçka është njohur si High Nature Value Forest Area dhe Important Plant Area, ku gjenden lloje dhe habitate me rëndësi kombëtare dhe ndërkombëtare. Këtu ndodhen edhe burimet e kripura në fshatin Popolzhan, të mbrojtura si monument natyror me rëndësi botërore (Kategoria III sipas IUCN), si dhe burimi i lumit Treska”, deklaroi koordinatori i projektit, Dejan Ilioski.

Nga Komuna e Kërçovës bëjnë të ditur se qëllimi kryesor i projektit është përmirësimi i gjendjes ekologjike dhe biodiversitetit të lumenjve Beliçka dhe Treska përmes zvogëlimit të mbeturinave, veçanërisht atyre plastike, si dhe zbatimit të një qasjeje të përbashkët në menaxhimin e mjedisit.

Projekti do të realizohet përmes katër komponentëve kryesorë:
Hartëzimi i zonave të ndotura dhe përgatitja e një qasjeje strategjike;
Aksione për pastrimin e lumenjve dhe vendosjen e pajisjeve inovative për grumbullimin e mbeturinave;
Punëtori edukative dhe fushata publike për rritjen e vetëdijes ekologjike;
Monitorimi i cilësisë së ujit dhe biodiversitetit.

Në zbatimin e projektit do të përfshihen administrata komunale, NP “Komunalec”, organizata të shoqërisë civile, bashkësitë lokale, sektori i biznesit, si dhe ekipe ekspertësh nga fusha e ekologjisë dhe mbrojtjes së mjedisit.

Sipas informacioneve të Komunës, pajisje të tilla inovative për grumbullimin e mbeturinave tashmë funksionojnë në Rotterdam, Rosenborg, Breda, Hagë, Bruksel dhe në lumin Crișul Repede në Rumani. Lokacioni i radhës në hartën evropiane do të jetë pikërisht Kërçova, me mbështetjen e partnerëve nga Rumania.

Nga pushteti lokal theksojnë se përmes projektit „Pastër-Kërçova“ do të krijohen kushte për lumenj më të pastër dhe më të shëndetshëm, me përfitime afatgjata për mjedisin dhe brezat e ardhshëm.

/porta.mk