Zajazi dhe Greshnica e Kërçovës, mbi dy dekada pa rrjet kanalizimi !

Zajazi dhe Greshnica e Kërçovës, mbi dy dekada pa rrjet kanalizimi !

Banorët e Zajazit dhe Greshnicës së Kërçovës me dekada presin realizimin e projektit të kanalizimit fekal. Ata shprehen të zhgënjyer nga partitë politike e sidomos nga BDI-ja, e cila kanalizimin e premtuar e nisi dhe e la në gjysmë. Me ardhjen e kryetarit të ri, sërish kanë vazhduar premtimet, megjithatë ende nuk ka asgjë konkrete në terren.


Kreu i Bashkësisë Lokale të Greshnicës thotë se gjendja është alarmante pasi në mungesë të kushteve elementare, banorët ndotin tokën dhe ujërat nëntokësorë me gropat septike.

“Kanalizimin e nisën, po e lanë jo në gjysmë por as një të tretën nuk e bënë në Greshnicë. Nëse flasim për kanalizimin çdo kush e di se ajo është një pastërti, nuk mundesh të rrish në ambient me erë. I kanë prishur rrugët e krejt, nxirr njëri ujërat e zeza këtu tjetri atje, përlahemi me bashkëfshatarët, po s’ka ku ta çojmë.


I mbajmë me cisterna, dhe e hedhim në lum dhe i ndotim ujërat ende më shumë, e prishim ambientin, lumi ka peshq. Po s`di kujt t’i vëmë fajin. Erdhën i morën makinat dhe një Zot e di pse çka bënë. Nis punën e le në gjysmë nuk shkon, kur ta nisësh o bëje o leje krejt”, tha Sefer Rrahmani, Kryetar i BL Greshnicë.

“I duhet fshatit, megjithëse filloi kanalizimi po mbeti gjysmak. Patjetër që i duhet fshatit”, tha një banor.
“Asnjëherë nuk u dha sqarim se përse ky projekt që financohej me IPA fondet nuk u përfundua. Ndërkohë, mbetet për tu parë nëse Qeveria aktuale do të mbaj premtimin për të filluar dhe përfunduar punimet për kanalizimin këtu në Zajaz”, thotë Bashkim Sulejmani, gazetar.

Kyreministri Hristijan Mickoski, gjatë vizitës së tij të fundit në Kërçovë, akuzoi ish Qeverinë BDI-LSDM për humbjen e mjeteve financiare të programit IPA për realizimin e kanalizimit në Zajaz. Mickoski premtoi se megjithatë me mjete nga buxheti i shtetit kanalizimi do të realizohet der inë fund të vitit.

Zajazi e Greshnica, nuk kanë vetëm mungesën e kanalizimit, por edhe infrastrukturë rrugore tejet të dëmtuar brenda fshatrave e cila edhe më shumë u dëmtua me fillimin e projektit të kanalizimit. Gjatë zgjedhjeve të fundit, çështja krahas shqetësimit lokal mori dimension politik meqë Ali Ahmeti mbi dy dekada në pushtet, nuk kishte arritur ta bëjë me kanalizim fshatin e tij të lindjes.

/Alsat.mk.

 




>