Çka po ndodh! Rusia bombardon në kufi me Poloninë?
Polonia po heton një shkelje të mundshme të hapësirës së saj ajrore nga objekte të paidentifikuara, pas raportimit për një shpërthim në lindje të vendit si pasojë e sulmit masiv të nisur nga Rusia drejt Ukrainës, ku në shënjestër ishte edhe qyteti Lviv.
Vendi anëtar i NATO-s kishte ngritur në ajër avionë ushtarakë dhe kishte intensifikuar monitorimin e hapësirës së saj ajrore, në përgjigje të aktivitetit raketor pranë kufijve perëndimorë të Ukrainës.
Sipas Komandës Operacionale të Forcave të Armatosura polake, incidenti ndodhi rreth orës 06:30 të mëngjesit, kur dyshohet se objekte të paidentifikuara mund të kenë hyrë në hapësirën ajrore të Polonisë. Ushtria bëri të ditur se po shqyrton të dhënat e radarëve dhe po verifikon raportimet për një përplasje të mundshme të një objekti në tokë.
Banorët raportuan një shpërthim të fuqishëm pranë fshatit Chmielek. Në rrjetet sociale po qarkullon edhe një video, e cila duket se tregon një ndriçim të fortë në qiell, të ndjekur nga një shpërthim.
Megjithatë, ushtria polake nuk ka konfirmuar ende shkakun e shpërthimit dhe as nëse një objekt ka shkelur realisht hapësirën ajrore të vendit. Si masë paraprake, autoritetet rritën gatishmërinë e sistemit polak të mbrojtjes ajrore. Gjithashtu, aeroporti i Rzeszów (Zhehh – Shoof) pezulloi përkohësisht operacionet, për shkak të kërcënimit të mundshëm.
Më herët, në qytetin lindor të Lublinit u aktivizuan sirenat e alarmit, ndërsa banorët morën një njoftim emergjent nga Qendra Qeveritare e Sigurisë, ku paralajmëroheshin për një sulm të mundshëm ajror.
Sulmet e fundit ndaj Ukrainës këtë të premte lanë 5 persona të vrarë dhe dhjetëra të plagosur. 3 prej viktimave humbën jetën në Kiev, kryeqytetin e Ukrainës, atje ku Rusia shënjestroi tri ura. Raketat dhe dronët rusë goditën edhe qytetin perëndimor të Lvivit në Ukrainë.
/albinfo
>
