Itali, arrestohet 27-vjeçari shqiptar, me makinë të vjedhur u përplas me mur !

Një shofer është arrestuar në Udine të Italisë, pasi automjeti që drejtonte u përplas me një mur gjatë një ndjekjeje me karabinierët. Ndaj tij rëndojnë akuza për kundërshtim të një zyrtari publik dhe përfitim të sendeve të vjedhura.

Ngjarja ndodhi një mbrëmje më parë dhe përfundoi në rrugën Tiepolo, ku makina u përplas me murin. Në automjet ndodheshin edhe dy persona të tjerë, të cilët u larguan pas aksidentit dhe janë ende në kërkim.

Sipas verifikimeve të kryera nga karabinierët, automjeti ishte vjedhur në rajonin e Venetos dhe qarkullonte me targa të klonuara. Gjatë kontrollit në makinë u gjetën para të gatshme dhe sende me vlerë. Hetuesit po verifikojnë prejardhjen e tyre, ndërsa hetimet vijojnë edhe për identifikimin dhe kapjen e dy personave të larguar.

Shoferi i arrestuar pritet të paraqitet para gjyqtarit për gjykim të drejtpërdrejtë.

/urgjent