Punëtorët në Zvicër përballen me vështirësi financiare !

Gjendja financiare e punëtorëve në Zvicër po bëhet gjithnjë e më shqetësuese. Sipas një studimi të ri, 38% e të punësuarve deklarojnë se problemet financiare ndikojnë negativisht në jetën e tyre, një rritje e konsiderueshme krahasuar me vitin 2024, kur kjo përqindje ishte 25%.

Këto të dhëna dalin nga një studim i kompanisë ndërkombëtare të konsulencës WTW, në të cilin kanë marrë pjesë rreth 41 mijë punonjës të ndërmarrjeve të mesme dhe të mëdha në 31 vende të botës, përfshirë afërsisht 1,000 të punësuar në Zvicër.

Rezultatet tregojnë se presioni financiar po ndikon gjithnjë e më shumë jo vetëm në mirëqenien personale të punëtorëve, por edhe në jetën e tyre profesionale, transmeton albinfo.ch.
Sipas Reto Ebnöther, përfaqësues i WTW Zvicër, shumë kompani ofrojnë përfitime dhe mbështetje për punonjësit, por këto masa nuk arrijnë gjithmonë të përmbushin nevojat reale të tyre.

Studimi tregon gjithashtu se punonjësit që përballen me shqetësime të mëdha financiare regjistrojnë pothuajse dyfish më shumë ditë mungese në punë krahasuar me ata që kanë më pak probleme ekonomike.

Në një periudhë kur kompanitë po përballen me presion për uljen e kostove, ekspertët vlerësojnë se punëdhënësit duhet të përqendrohen në përmirësimin e efektivitetit të përfitimeve dhe shërbimeve që tashmë u ofrojnë punonjësve.

Inteligjenca artificiale shton pasigurinë për vendet e punës
Përveç vështirësive financiare, një tjetër shqetësim i rëndësishëm për punëtorët është ndikimi i inteligjencës artificiale (IA) në tregun e punës.

Në nivel ndërkombëtar, pothuajse dy në pesë punonjës kanë frikë se zhvillimi i inteligjencës artificiale mund të ndikojë ndjeshëm në sigurinë e vendeve të tyre të punës.

Ndërkohë, në Zvicër, inteligjenca artificiale është tashmë pjesë e përditshmërisë profesionale për 54% të të anketuarve, duke dëshmuar përhapjen e shpejtë të kësaj teknologjie në mjediset e punës.

Këto zhvillime nxjerrin në pah sfidat me të cilat po përballen punonjësit në Zvicër, të cilët, krahas presionit financiar, duhet të përshtaten edhe me ndryshimet teknologjike që po transformojnë tregun e punës.

Studimi thekson rëndësinë e mbështetjes më efektive të punonjësve, si në aspektin e mirëqenies financiare, ashtu edhe në përballimin e ndryshimeve që sjell teknologjia.

/albinfo