Gjermani: Shqiptari kapet me tri dokumente Polake të blera në TikTok !

Një 29-vjeçar nga Shqipëria është ndaluar në Aeroportin e Frankfurtit, pasi tentoi të udhëtonte drejt Dublinit me dokumente polake të falsifikuara. Sipas hetimeve fillestare të Policisë Federale gjermane, ai i kishte blerë dokumentet përmes rrjetit social TikTok.

Ngjarja ka ndodhur më 9 nëntor 2026, gjatë kontrollit të dokumenteve përpara nisjes. I riu u paraqiti policëve një pasaportë polake, por parregullsitë e vërejtura në të ngritën dyshime për autenticitetin e saj.

Ekzaminimi nga specialistët konfirmoi se pasaporta ishte e falsifikuar. Gjatë kontrollit të mëtejshëm, policia gjeti edhe një letërnjoftim dhe një patentë shoferi polake, të cilat rezultuan gjithashtu të falsifikuara.

Sipas autoriteteve gjermane, 29-vjeçari kishte hasur në oferta për dokumentet në TikTok dhe më pas i kishte blerë. Ai dyshohet se synonte të paraqitej si shtetas i Bashkimit Evropian për të punuar në Irlandë pa autorizimin e nevojshëm.

Policia Federale ka nisur hetimet ndaj tij nën dyshimin për falsifikim dokumentesh. Atij iu ndalua vazhdimi i udhëtimit drejt Dublinit dhe, po atë ditë, u kthye me aeroplan në Tiranë. Autoritetet nuk kanë bërë të ditur shumën që kishte paguar për dokumentet.

/ts