Isa Boletini (1864 – 1916)

Isa Boletini është një nga figurat më të shquara të historisë shqiptare, i radhitur krahas prijësve të mëdhenj të luftës për liri dhe pavarësi. I lindur dhe rritur në Boletin të Mitrovicës, në një familje atdhetare, ai u kalit që herët me armë në dorë dhe ia kushtoi gjithë jetën çështjes kombëtare. Që nga beteja e parë në Slivovë (1881) e deri në shpalljen e pavarësisë, Isai luftoi pa kompromis kundër pushtuesve osmanë, serbë e malazezë, duke u bërë simbol i qëndresës shqiptare.

Përveç si luftëtar i shquar, Isa Boletini u dallua edhe si strateg, diplomat dhe tribun popullor. Ai refuzoi çdo ofertë për privilegje personale, duke theksuar se luftonte vetëm për lirinë e atdheut. Kontribuoi në bashkimin e popullit, pajtimin e gjaqeve dhe organizimin e kryengritjeve të mëdha kombëtare. Mori pjesë në ngjarjet vendimtare të vitit 1912 dhe përfaqësoi çështjen shqiptare edhe në arenën ndërkombëtare, përfshirë Konferencën e Londrës.

” Unë jam mirë kur ashtë mirë Shqipnia!”
Isa Boletini u vra tradhtisht më 23 janar 1916, së bashku me dy djemtë dhe bashkëluftëtarët e tij. Ai ra heroikisht në moshën 52-vjeçare, duke lënë pas një trashëgimi të pavdekshme të sakrificës për liri. Në vitin 1962, shteti shqiptar e shpalli Isa Boletinin Hero të Popullit.

/ms