Mickoski sulmon ashpër Taravarin

“Nuk ka garanci më të madhe për rrugën eurointegruese të shtetit sesa ndërprerja përfundimtare e kontratës me kompaninë “Gjoka Construction”. Me këtë përgjigje të ashpër dhe të drejtpërdrejtë, kryeministri i Maqedonisë së Veriut, Hristijan Mickoski, komentoi deklaratën e mbrëmshme të liderit të Aleancës për Shqiptarët, Arben Taravari, i cili la të hapur mundësinë e rikthimit në Qeveri duke kërkuar “garanci për eurointegrimet”.

“Këto çështje nuk diskutohen përmes mediave”, deklaroi Mickoski.
I pyetur nga gazetarët se cili ka qenë ministri më i suksesshëm dhe më pak i suksesshëm në kabinetin e tij, si dhe nëse ka vend për partnerë të rinj koalicioni, Mickoski njoftoi se tashmë ka nisur procesi i rindërtimit të Qeverisë. Ai konfirmoi se po zhvillohen bisedime intensive për rikonstruimin e kabinetit qeveritar dhe kërkoi pak më shumë durim nga publiku, duke paralajmëruar se brenda pak ditësh gjithçka do të bëhet e ditur.

Ndërkohë, Taravari mbrëmë në TV Shenja la të hapur mundësinë që Aleanca për Shqiptarët të rikthehet në pushtetin ekzekutiv, por vetëm nëse arrihet një marrëveshje e re politike me garanci të qarta.

“Është poshtëruese të rikthehesh aty prej nga je larguar”, deklaroi Taravari, duke shtuar se një rikthim i tillë mund të ndodhë vetëm mbi bazën e një marrëveshjeje të re.

Sipas tij, çdo marrëveshje eventuale duhet të përmbajë garanci të qarta për nisjen e negociatave me Bashkimin Evropian dhe për realizimin e ndryshimeve kushtetuese.

“Vetëm me një marrëveshje të re, ku do të kishte të paktën garanci për fillimin e negociatave me BE-në dhe për ndryshimet kushtetuese, mund të bisedohet. Përndryshe, nuk ka për çfarë të bisedohet”, theksoi Taravari.

/(INA)