Lajm i mirë: Pensionistët me më shumë para muajin e ardhshëm – pensionet rriten për 3%

Pensionet në Maqedoninë e Veriut do të rriten për 3 për qind. Rritja do të zbatohet sipas shumës së pensionit që merr secili pensionist dhe këtë herë nuk do të jetë lineare.
Drejtori i Fondit për Sigurim Pensional dhe Invalidor, Nikolla Memov, ka konfirmuar se rritja e pensioneve të shtatorit do të jetë 3 për qind.

Kjo do të thotë se pensionistët do të marrin shuma të ndryshme shtesë, në varësi të pensionit aktual. Për shembull, një pension prej 20.000 denarësh do të rritet për 600 denarë, duke arritur në 20.600 denarë.

Në Fond tashmë po bëhen përllogaritjet për shumat e reja, ndërsa rritja pritet të reflektohet gjatë pagesës së pensioneve muajin e ardhshëm.

Ndryshe nga rritjet e mëparshme lineare, këtë herë pensionet do të harmonizohen në përqindje. Gjatë dy viteve të fundit, pensionet janë rritur në mënyrë lineare në katër raste, me një shumë të përgjithshme prej 7.000 denarësh.

/infoshqip