Temperaturat e rritura nga ndotja e karbonit shkaktuan vdekjen e rreth 50 mijë personave vitin e kaluar..!
Moti i nxehtë i përkeqësuar nga ndotja e karbonit vrau gati 50,000 njerëz në Evropë vitin e kaluar, me kontinentin që po ngrohet me një ritëm shumë më të shpejtë se pjesët e tjera të botës, sipas një hulumtimi.
Rezultatet e hulumtimit dalin në dritë ndërsa zjarret e egra përfshinë pyjet pranë Athinës, ndërsa Franca lëshoi paralajmërime për nxehtësi ekstreme në pjesë të mëdha të vendit, dhe Mbretëria e Bashkuar po përballet me atë që “Met Office” pret të jetë dita më e nxehtë e vitit.
Mjekët e quajnë nxehtësinë një “vrasës të heshtur” sepse ajo merr shumë më tepër jetë sesa shumica e njerëzve e kuptojnë. Norma shkatërruese e vdekshmërisë në vitin 2023 do të kishte qenë 80% më e lartë nëse njerëzit nuk do të ishin përshtatur me temperaturat në rritje gjatë dy dekadave të fundit, sipas studimit të publikuar në Nature Medicine.
Elisa Gallo, një epidemiologe mjedisore në ISGlobal dhe autore kryesore e studimit, tha se rezultatet tregojnë se përpjekjet për të përshtatur shoqëritë me valët e të nxehtit kanë qenë efektive, ka raportuar The Guardian.
“Por numri i vdekjeve të lidhura me nxehtësinë është ende shumë i lartë,” paralajmëroi ajo. “Evropa po ngrohet me dyfishin e ritmit të mesatares globale – nuk mund të qëndrojmë duarkryq.”
Valët e të nxehtit janë bërë më të nxehta, më të gjata dhe më të zakonshme, ndërsa njerëzit kanë djegur karburante fosile dhe kanë shkatërruar natyrën – duke bllokuar atmosferën me gaze që veprojnë si një serrë dhe ngrohin planetin. Në nivel global, viti 2023 ishte viti më i nxehtë i regjistruar ndonjëherë, dhe shkencëtarët presin që viti 2024 së shpejti të zërë vendin e tij.
Studiuesit kanë zbuluar se vendet më të ftohta në Evropë, si Mbretëria e Bashkuar, Norvegjia dhe Zvicra, do të përballen me rritjen më të madhe relative në numrin e ditëve të nxehta të padurueshme. Por numri absolut i vdekjeve do të vazhdojë të jetë më i madh në Evropën jugore, e cila është më mirë e përshtatur për motin e nxehtë, por më e ekspozuar ndaj temperaturave përvëluese.
/ts
