Mërgimtarët mbushin Kërçovën – Mungesa e parkingjeve, problem..! (VIDEO)
Mërgimtarët i japin gjallëri Kërçovës, por nga ana tjetër numri i madh i veturave vështirëson dhe rëndon trafikun. Për këtë arsye qytetarët detyrohen të parkohen vend e pavend sepse vështirë gjen parkim. Mendojnë se ky qytet me kaq shumë mërgimtarë ka nevojë për parking publik qoftë nëntokësorë apo mbitokësorë.
-“Nuk është lehtë, për të gjetur vend parkim, interesant këtu është bërë që secili njeri ka një veturë edhe vjen parkohet. Nuk kemi çfarë të bëjmë por kështu si është do të kaloj”
-“Unë mendoj që po ka nevojë për parking, ka nevojë”
“Uhuu.. unë kam thënë që moti po nuk bëhet, ka nevojë ka jo për një por për më shumë. Nevojë ka për parking nëntokësor a mbitokësor a mbi kala kryesore parking duhet”
Në dhjetor të vitit 2022, kryetari i Kërçovës Fatmir Dehari në takim me mërgimtarët tha se këtë vit do të fillojnë parkingjet me pagesë, duke e cilësuar si një punë të domosdoshme për shmangien e parkimit vend e pa vend. Ai për këtë vendim pyeti mërgimtarët të cilët u përgjigjen me PO.
“Sa jeni për po që vitin e ardhshëm të fillojë parkingu me pagesë, mendojmë që jeni krejt? Atëherë vitin e ardhshëm Ndërmarrja Komunale nga sot e merr për detyrë që të filloj parking me pagesë”, pati deklaruar Fatmir Dehari në dhjetor të vitit 2022.
Por që atëherë ende nuk është ndërmarrë asnjë hap për parkimin me pagesë, edhe pse tabelat për parkim me pagesë janë vendosur ka gati dy vite. Kohë më parë, kur TV21 zhvilloi një anketë me mërgimtarët e Kërçovës, ata pajtoheshin që parkimi të bëhet me pagesë, por kjo nuk u pa me sy të mirë nga vendasit të cilët thoshin se ardhurat i kanë të ulëta ndërsa çmimet janë të shtrenjtuar gjithandej.
VIDEO:
/tv21
