Kërçovë, mirënjohje ndaj afaristëve dhe mërgimtarëve..

Në Kërçovë u mbajt tryeza e mirënjohjes ndaj afaristëve dhe mërgimtarëve kërçovarë.
Në organizim të Lëvizjes qytetare “Te Berza” mbrëmë në Kërçovë u mbajt tryeza e mirënjohjes ndaj mërgimtarëve dhe afaristëve kërçovarë, të cilët ndihmuan në realizimin e projekteve të rëndësishme humanitare për familjet me statut të rrezikuar social. Për këtë mbështetje humanitare, atyre iu shprehën mirënjohje dy humanistët e njohur, hoxhë Halil Kastrati dhe humanistit kërçovar, Shkodran Halili.

Shoqata humanitare “Jetimat e Ballkanit”, gjatë periudhës 14-vjeçare të veprimtarisë, ka realizuar projekte shumë të rëndësishme humanitare me të cilat janë ndihmuar jetimët dhe skamnorët. Falë kontributit të njerëzve me shpirt human, ku bëjnë pjesë edhe kërçovarët, deri më tani janë ndërtuar 1 mijë e 600 shtëpi, është hapur kuzhina popullore ku marrin ushqime mbi 1 mijë persona, janë ndihmuar me bursa 400 nxënës e studentë, ndërsa rreth 12 mijë familje ndihmohen me pako ushqimore, tha humanisti, Halil Kastrati, në takimin e mbrëmshëm me afaristët dhe mërgimtarët e Kërçovës.

Mërgata kërçovare dhe afaristët e kësaj ane janë të njohur për vepra humane ndaj njerëzve në nevojë. Kanë ndihmuar aksionin e shpërndarjes së ilaçeve për të moshuarit, iftaret për skamnorët gjatë muajit të Ramazanit, bursat për nxënësit dhe studentët, rinovimin e repartit të urgjencës, ndërtimin e 25 shtëpive për familjet skamnore të Kërçovës dhe projekte të tjera nga fusha e arsimit dhe shëndetësisë, potencoi humanisti, Shkodran Halili.

Ai nënvizoi se gjatë muajve të ardhshëm, do të përfundojnë punimet edhe në objektet tjera dhe do të përmbyllet në tërësi projekti i shoqatës “Jetimat e Ballkanit” për ndërtimin e 25 shtëpive të planifikuara për familjet skamnore të Kërçovës dhe 65 objekteve të tjera të planifikuara për familjet me status të rrezikuar social nga komunat tjera të vendit.

/al.mrt.com.mk