Tv Gurra: Urimet për ditën e gjuhës Rome, por ku mbetën projektet kulturore romë në Kërçovë?

Kryetari i Komunës së Kërçovës, Dr. Aleksandar Jovanovski, me rastin e 5 nëntorit – Ditës së Gjuhës Rome, ka përcjellë një mesazh urimi për komunitetin rom, duke theksuar rëndësinë e ruajtjes së gjuhës, kulturës dhe identitetit rom.
Në mesazhin e tij, kryetari thekson se diversiteti është pasuri e shoqërisë dhe se çdo gjuhë e kulturë meriton respektin e duhur.

Megjithatë, krahas këtij mesazhi festiv, lind një pyetje që kërkon përgjigje: Sa përputhen urimet institucionale me mbështetjen konkrete për kulturën rome?
Në projektet kulturore të Komunës së Kërçovës, përkatësisht në kuadër të programit të qytetit si Qytet i Kulturës, sipas informacionit të paraqitur, nuk është financuar asnjë projekt kulturor rom.

Nëse flasim për ruajtjen e gjuhës, kulturës dhe identitetit të një komuniteti, kjo nuk mund të mbetet vetëm në nivelin e urimeve ceremoniale dhe fotografive simbolike.

Mbështetja duhet të dëshmohet edhe përmes projekteve konkrete, financimit të aktiviteteve kulturore, promovimit të gjuhës dhe krijimit të mundësive që komuniteti rom të jetë pjesë aktive e jetës kulturore të qytetit.

Sepse respekti për diversitetin nuk matet vetëm me fjalë, por edhe me veprime dhe mundësi të barabarta për të gjithë.
5 Nëntori le të jetë jo vetëm ditë urimesh, por edhe një moment reflektimi për përgjegjësinë institucionale ndaj kulturës dhe identitetit të komunitetit rom

/tvgurra