A duhet që parkimi në Kërçovë të bëhet me pagesë..? (VIDEO)
Është bërë një vit që kur janë vendosur tabelat për parking me pagesë në Komunën e Kërçovës, por ende janë jashtë funksionit. Gjatë verës, kur vijnë mërgimtarët, në qytet krijohet kaos për shkak të mungesës së parkingjeve dhe parkimit vend e pa vend, por në pjesën tjetër të vitit situata është më e qetë.
Kryetari i Kërçovës Fatmir Dehari në dhjetor të viti të kaluar në takim me mërgimtarët tha se këtë vit do të fillojnë parkingjet me pagesë, duke e cilësuar si një punë të domosdoshme për shmangien e parkimit vend e pa vend. Ai për këtë vendim pyeti mërgimtarët të cilët u përgjigjen me PO.
“Sa jeni për po që vitin e ardhshëm të filloj parkingu me pagesë, mendojmë që jeni krejt? Atëherë vitin e ardhshëm Ndërmarrja Komunale nga sot e merr për detyrë që të filloj parking me pagesë”, tha Fatmir Dehari, kryetar i komunës së Kërçovës (dhjetor 2022).
Por qytetarët që jetojnë këtu janë kundër. Ata që i anketo TV21 e shohin si barrë shtesë për qytetarin në krizë ekonomike.
-Mendoj se nuk ka nevojë për një gjë të tillë, në këtë standard të ulët nuk ka nevojë për pagesë të parkingjeve, sepse gjithkund ku ka standardë ka edhe parking edhe pagesë parking, këtu në qytet pas gjithë atyre që kanë shkuar në mërgim mendoj se nuk ka nevojë të paguhet.
-Realisht është e nevojshme të jetë me pagesë që të rregullohet, por kush ta paguaj atë? Këtu qëndron problemi, standardi është i ulët, mundohemi tija dalim diqysh ose kurrqysh.
-Nuk ka nevojë për atë, ende duhet të digjet populli?
-Le të mos na marrin para, unë ju them.
-Jo nuk duhet, pse të bëhen me para, pak para marrin, për regjistrim për këtë për atë, marrin para.
Parkimi me pagesë në këtë qytet ende nuk ka filluar edhe pse kanë kaluar 9 muaj që kur Dehari e ka deklaruar këtë gjë. TV21 kërkoi një qëndrim të ri nga kryetari i Kërçovës, por nuk morëm një përgjigje.
VIDEO:
/tv21
