Shoqata Etno-Vlera prezentoi koncertin me yjet e pop-rokut shqiptar Uskana (VIDEO)

e mbështetjen e Ministrisë së Kulturës, mbrëm në Qendrën për Kulturë në Kërçovë, shoqata Etno-Vlera, mbajti koncertin me yjet e pop rokut shqiptar. Programi filloi me këngën “Uskana ime e dashur” e interpretuar nga Naser Ballazhi dhe Sali Shabani. Kjo këngë është kënduar me plot pasion nga grupi kërçovar “Uskana” më vitin 1983, por ajo edhe sot e kësaj dite ngjallë emocione të veçanta tek kërçovarët. /XixaPress

Programi vazhdoi me interpretimet e solistes së njohur nga Gostivari Saranda Ymeri, e cila prezentoi këngët “Eja” dhe “Tani më ke zemër”. Ndërkaq solistja Betime Zylali para publikut kërçovar prezentoi këngët “Origjinal” dhe “Zemrën ma more”. Më pas këngëtari i njohur Naser Ballazhi interpretoi këngët “Rima e fundit” dhe “Toka jonë”, ndërsa Sali Shabani prezentoi dy këngët e albumit të tij më të ri, “Vals mesnate” dhe “Plak i ri”.

Pas prezentimit dinjitoz të disa këngëve të vjetra të grupit “Uskana”, anëtari dhe njëri ndër themeluesit e këtij grupi Qamil Aliu, para të pranishmive shpalosi rrugëtimin 40 vjeçar dhe mbresat e kësaj veprimtarie të bujshme artistike. Grupi muzikor “Uskana”, tha ai, që nga viti 1983 e deri në ditën e sotme, me përkushtim të plotë e ka kultivuar këngën e bukur shqipe.

Me këtë rast, shoqata Etno-Vlera ndau disa mirënjohje për kultivimin dhe afirmimin e muzikës shqiptare. Këto mirënjohje i ndau gazetari dhe profesori universitar Sadik Emroja, ndërsa aktivisti i njohur i mërgatës shqiptare Ramazan Bekteshi, grupit “Uskana” i ndau pllakatën e mirënjohjes për kontributin e dhënë ndër dekata, në kultivimin dhe afirmimin e vlerave artistike të këngës shqipe.

Programi vazhdoi me këngë të tjera të interpretuara me plot pasion nga solistët e njohur të këngës shqipe, të cilat ngjallën emocione të shumta dhe u duartrokitën fuqishëm nga publiku kërçovar.

VIDEO:

/ms