Kërçovë, mini-fabrikë e betonit në mes të lagjes / Banorët ankohen se çdo ditë përballen me pluhur dhe zhurmë..(VIDEO)

Banorët e lagjes Pashin e Epërme në Kërçovë janë në hall me një mini-fabrikë për prodhimin e betonit e cila ndodhet shumë afër shtëpive të tyre.
Ata thonë se tashmë 5 vjet po përballen me pluhurin, rërën dhe zhurmën që shkaktojnë makineritë.

Banorët disa herë kanë kërkuar nga organet kompetente të ndërmarrin masa por, deri më tani kanë hasur në vesh të shurdhër.

“Kemi problem me këtë bazën e betonit e cila bënë shumë zhurmë dhe pluhur dhe nuk është e mirë për lagjen dhe për gjithë ne sepse po na dëmton shumë. Ne kërkojmë zgjidhje dhe si të vetëm zgjidhje pamë mediat “
Banorët thonë se për shkak të pluhurit dhe zhurmës së madhe nuk mund t’i lejojnë fëmijët të qëndrojnë në oborr. Janë të detyruar që gjatë ditës t’i mbajnë të mbyllur në shtëpitë.

“Ngrihet shumë pluhur dhe ka shumë zhurmë dhe mund të ndikoj edhe tek dëgjimi i fëmijëve, sepse është zhurmë e madhe dhe më një fjalë na pengon shumë. Në botë nuk ka që një bazë betoni të jetë në afërsi të disa shtëpive më pak se 50 metra afër, bile më afër mund t’i matni”

Banorët treguan një dokument, përmes së cilit, Inspektorati i ndërtimit në vitin 2017, kompanisë në fjalë ja ka ndërprerë punimet për shkak mos pasjes së lejes.

TV21 kontaktoi edhe pronarin kompanisë por, ai nuk deshi të komentojë në lidhje me reagimin e banorëve, vetëm se tha që posedon leje.
Ligji i Ambientit jetësorë parasheh që këto kompani duhet të posedojnë leje të integruar B që vërtetojnë se të njëjtat nuk ndotin ambientin dhe nuk dëmtojnë rrethin ku punojnë.

TV21 gjatë ditës së nesërme do të kërkojë përgjigje nga institucionet kompetente për të parë nëse kjo kompani është e pajisur me leje të integruar B.
Ndryshe në këtë lagje ka një kompani tjetër transportuese, kamionët e së cilës gjithashtu krijojnë pluhur dhe baltë.

VIDEO:

/tv21