Kërçova para 10 viteve u bë me kryetar Shqiptar..(VIDEO)

Kjo ishte atmosfera që mbretëroi në Kërçovë menjëherë pas shpalljes së fitores nga ana e BDI-së. Me këtë rast rrugët e Kërçovës u vërshuan me qytetarë të cilët kishin dalë për të festuar fitoren e Fatmir Deharit. Gëzimin e ndjenin më së shumti mërgimtarët, mundi i të cilëve nuk shkoi kot.

“Jemi aq shumë të gëzuar, kemi ardhur nga Amerika për të festuar këtë fitore të madhe. Kjo është fitore e gjithë shqiptarëve.

Fitore jo vetëm e Kërçovës por e gjithë shqiptarëve. Ju lumtë edhe juve këtu, të gjithë kanë bërë një punë shumë të mirë, vërtet kjo fitore është e gjithë popullit të Kërçovës. Ju lumtë dhe ju uroj suksese të rejë këtu në Kërçovë”.

“Ne kemi ardhur nga Shtetet e Bashkuara të Amerikës dhe jemi shumë të gëzuar që arritëm fitoren e Kërçovës”.

“Jam shumë i kënaqur që kemi fituar. Kjo do të mbahet mend si histori. Prej mërgimit kam ardhur, nga Zvicra, kemi ardhur ekstra për këto votime “.

Në mesin e kërçovarëve ka edhe prej atyre që fitoren e Kërçovës e konsiderojnë me momentin e shpalljes së Kosovës shtet.

“Jashtëzakonisht i gëzuar dhe i emocionuar. Ashtu siç u shpall Kosova Republikë para disa viteve dhe është shtet i ri edhe Kërçova pas shumë viteve fitoi një kryetar shqiptarë.

Ne kemi vuajtur për këtë, por merita është e të gjithëve veçanërisht do ët falënderoja të gjithë ata bashkatdhetarë të cilët në mënyrë vullnetare dhe me plot emocione erdhën dhe e mbushën Kërçovën. Dhe sytë e gjithë mediave, jo vetëm në Maqedoni por edhe në botën e jashtme u drejtuan në Kërçovë”, u shpreh një qytetar i Kërçovës.

Ndërkohë, tashmë kreu i ardhshëm i Kërçovës Fatmir Dehari shprehu një falënderim të madh për gjithë Kërçovarët e posaçërisht për mërgimtarët të cilët kaluan me mijëra kilometra vetëm e vetëm për të votuar që Kërçova të shndërrohet në Uskanë. Dehari madje tha se populli e bëri punën e vet, tani radhën e ka ai me realizimin e projekteve në të mirë të qytetarëve.

“Do të falënderoj nga zemra, nga shpirti në këtë moment të gjithë bashkatdhetarët tanë që erdhën nga çdo pjesë e botës, na ndihmuan në mënyrën më dinjitoze. Votuan në mënyrën më dinjitoze dhe u kthyen në mënyrën më dinjitoze në vendet e tyre të punës. Do të falënderoj popullin e Kosovës, mbështetësit nga çdo vend që na mbështetën këtu në Kërçovë.

Falënderoj kryetarin për atë mbështetje, për atë përkrahje për atë guxim zotin Ali Ahmeti, familjen time që ka qëndruar afër meje. Kërçova sot dha një provim të madh tregoi për vlerat demokratike qytetare, për vlerat tona shqiptare. Kërçova sot dha një provim të madh, tregoi se vlerat demokratike qytetare, tregoi për vlerat tona shqiptare qytetare. Mua më mbetet që të vazhdoj punën “, tha Fatmir Dehari, kryetar i Kërçovës.

Kërçova do të udhëhiqet për herë të parë nga një kryetar shqiptarë. Kjo erdhi edhe si rezultat i ndryshimeve të fundit të ligjit për ndarjen territoriale ku disa komuna si ajo e Zajasit, Osllomesë, Vraneshticës dhe Dugovës iu bashkëngjitën qytetit të Kërçovës, dhe e shndërruan atë në qytet me shumicë shqiptare.

VIDEO:

/tvkoha