Kërçovë: Për 3 vjet janë mbyllur rreth 100 dyqane..! (VIDEO)

Rreth 100 biznese të vogla janë mbyllur në Kërçovë brenda tre vitesh. Gati çdo i dyti dyqan ka të ngjitur letër ku shkruan se jepet me qira.

Kjo më e dukshme është në pjesën e vjetër të qytetit, gjë që e konfirmon edhe kryetari i Odës Ekonomike në Kërçovë Igor Sokoleski.

“Janë biznese me dy ose tre të punësuar, numri rrotullohet rreth 100 dyqane të vogla të cilat të cilat janë mbyllur, edhe vetë mund të shihni se një numër i madh në çarshi shkruajnë dyqani jepet me qira”, tha Igor Sokoleski, kryetar i Odës Ekonomike.

Nga ana tjetër ata që janë të hapur po kërkojnë punëtorë. Në çdo të tretin biznes mund të vëresh letra të ngjitura ku kërkojnë punëtorë, por vështirë paraqitet ndokush.

“Problemet në sektorin privat nuk janë mjete financiare sepse po ta shohim mirë do të shohim mirë se në tregun e punës të rinjtë nuk janë mjaftueshëm të kualifikuar që të lëshohen për të punuar në sektorin privat”, pohoi Igor Sokoleski, kryetar i Odës Ekonomike.

Ndryshe mendon kryetari i Komunës së Kërçovës, Fatmir Dehari, i cili thotë se të rinjve më shumë u pëlqen që të punojnë në sektorin publik, se atë privat sepse liria në punë është më e madhe nëse je i punësuar në punë shteti.

“Kërkimi i një vendi pune në institucionet shtetërore ku për një arsye të një lirie apo kënaqësie në punë që shpesh janë edhe studime psikologjike të kënaqësisë në punë, numri më i madh i të punësuarve rangon në pikën më të lartë të kënaqësisë në punë, lirisë në punë, pastaj është edhe një argument tjetër rroga, paga që jepet nga sektori privat”, theksoi Fatmir Dehari, kryetar i komunës së Kërçovës.

Në statistikat e Entit për Punësim figuron se në Kërçovë janë 3750 persona të pa punë, edhe atë 2136 me shkollim fillore, 266 që nuk e kanë përfunduar shkollimin e mesëm, 971 me shkollim të mesëm, 32 me fakultet sistemi bachelor 3-vjeçar, 306 me fakultet sistemi 4-vjeçar, 37 me master dhe 2 doktorë shkencash.

VIDEO:

/tv21