Kërçovë thuajse çdo ditë një sulm nga qentë endacakë..! (VIDEO)
Thuajse çdo ditë të vitit 2022 një banor i Kërçovës ka qenë pre e sulmeve nga qentë endacak, tregojnë statistikat vjetore të Sektorit për Punë të Brendshme Ohër.
Në 365 ditë të vitit, 252 qytetarë kanë denoncuar sulm nga qentë, ndërsa numri mund të jetë edhe më i lartë duke marrë parasysh rastet që nuk janë paraqitur në polici. Në krahasim me vitin 2021, sulmet janë shtuar.
“Në rajonin e Kërçovës gjatë vitit 2022 në stacionin policor janë paraqitur 252 qytetarë për sulme nga qentë endacak. Ka një rritje të numrit të sulmeve nga qentë endacak krahasuar me vitin 2021 kur të paraqitura ishin 237 sulme nga qentë endacak”, tha Stefan Dimovski, zëdhënës SPB-Ohër.
Në anketat e zhvilluara gjatë viti, qytetarët hall më të madh i kishin sulmet e papritura që mund t’u vinin nga qentë e rrugës.
“Këtu dy apo tre herë kam mbrojtur fëmijë të cilët shkojnë në shkollë, i kam takuar por edhe mua më kanë sulmuar”.
“Qen ka si të kemi dhen, është e ndaluar t’i qortosh, t’i rrahësh nuk ka fëmijë që nuk e kanë sulmuar edhe nipin tim para disa ditësh e kafshuan”.
“Qentë t’i largojnë, do të na hanë qentë, shihe para xhamisë si është, kthehu ta shohësh si është para xhamisë, po ja shihe këtu, njeri i vjetër shihe, ku të shkojë?!”
Qytetarët edhe para kryetarit të Komunës së Kërçovës kanë kërkuar zgjidhje për këtë problem, por Fatmir Dehari arsyetohet duke thënë banorët e qytetit dhe fshatrave nuk e lejojnë që të ndërtohet stacion afër vendbanimeve të tyre. Shton po ashtu se ekziston një zgjidhje në bashkëpunim me komunën e Makedonski Brodit, por që ende nuk ka epilog.
“Duke e pasur këtë problem edhe pjesa e Makdonski Brodit kryetari i saj në takim para dy javësh ka ardhur në zyrën time e ka parë projektin dhe kemi rënë dakord që nëse ai siguron vendin, parcelën ndërtimore, investimin do ta bëjmë bashkë, pjesën më të madhe komuna jonë”, pohoi Fatmir Dehari, kryetar i komunës së Kërçovës.
Për këtë vit komuna e Kërçovës ka ndarë 20 mijë euro për sterilizimin dhe kastrimin e qenve endacakë. Rreziku nga sulmet e qenve shtohet gjatë dimrit, shkaku i mungesës së ushqimit.
E vetmja organizatë që kujdeset për këta qen është “Grifon” e cila mundohet t’i ushqej dhe t’i mbajë nën kontroll. Përllogaritjet e tyre tregojnë se vetëm në Kërçovë e rrethinë janë rreth 700 qen endacakë.
VIDEO:
/tv21
