Kërçovarja Lulzime Osmani piktorja e ndjeshmëris Ekzistenciale

Arti i Lulzime Osmanit mund të përshkruhet si një përzierje e ndjenjave të dhembshurisë dhe rebelimit ndaj rrethit të padrejtë shoqëror, por gjithashtu i ndjenjave të dashurisë dhe shpresës për një të ardhme më të mirë. Në ekspozitën e fundit “ Kush jam unë dhe pse jam këtu…?”, ajo përmes një simbolike ekzistenciale ka përçuar te publiku ndjesinë e përjetësisë.

Piktorja Lulzime Osmani shpërfaq një sërë figurash abstrakte që përqafojnë njëra-tjetrën, të mbështjella me një dizajn të këndshëm dhe elemente valëzuese, të cilat bashkohen aq bukur si një trup i vetëm poezie. Ajo ka një studio në Kërçovë, ku punon me fëmijët. Osmani thotë se kjo e përmbushë më tepër se çdo gjë tjetër.

Në fillimet e saj, artistja është frymëzuar duke konsumuar atë lloj të artit që si pikësynimi kishte jetën e përditshme, problematikat e ndryshme sociale, dhe mënyrën se si njerëzit paragjykojnë pa mos të njohur. Nëpërmjet portreteve të deformuara Osmani e ka shprehur fjalorin e saj artistik dhe të sofistikuar të mbushur me imazhe metaforike që pohojnë jetën e vështirë në vendin tonë.

Nëpërmjet vijave dhe ngjyrave të orkestruara aq bukur artistja është munduar që t’i ndalojë dhe ndryshojë paragjykimet e shumta që vijnë nga shoqëria, sidomos në këtë aspekt Osmani e veçon ngjyrën e kuqe të përdorur në sytë dhe buzët e atyre portreteve, ku ajo shpalos një thesar të mundësive dhe interpretimeve emocionale.

Përpos aftësisë së saj në grafikë momentalisht artistja është fokusuar në pikturë, ku mishëron karakteristika të ekspresionizmit abstrakt. Si një koloriste e shkëlqyer ajo e dominon pëlhurën me ngjyrat akrilike duke krijuar tekstura ritmike që shprehin idetë dhe ndjenjat e saj.

Artistja nga Kërçova Lulzime Osmani
Përdorimi i saj i shkathët i furçave, thikave të paletës dhe mjeteve të tjera i jep zë artistes që të jetë e pranishme në problematikat aktuale që po e ngulfasin artisten.

Ekspozitën e saj të fundit, Osmani e ka realizuar në galerinë e qytetit të Tetovës me ftesë nga vetë drejtori i galerisë, gjithashtu me mbështetje të Ministrit të Kulturës. Artistja ka realizuar njëzet piktura të kombinuara, përveç përdorimit të ngjyrave të akrilit, nëpërmjet të cilave e ka shprehur gjuhën e saj vizuale.

Osmani thotë se kishte vendosur që ta titullonte ekspozitën “Kush jam unë dhe pse jam këtu..?”, pra me një tematikë filozofike për të treguar artisten, për të treguar se kush është ajo në të vërtetë, dhe për të përçuar një mesazh tek publiku që çdokush duhet të përpiqet ta përmbushë veten.

Artistja nga Kërçova Lulzime Osmani u lind në qytetin e Manastirit. Fëmijërinë e kaloi në qytetin e Kërçovës. Shkollimin fillor dhe atë të mesëm e kreu në Kërçovë, pastaj ndoqi studimet e larta në drejtimin e Grafikës në Fakultetin e Arteve Figurative në Tetovë. Studimet postdiplomike i kreu në Universitetin “Hasan Prishtina” në Prishtinë, po ashtu në drejtimin e grafikës, ndërsa studimet e doktoraturës i ndoqi në New Bulgarian University, në Sofie të Bullgarisë.

Osmani sot posedon studion e saj në Kërçovë, ku janë të regjistruar 47 fëmijë. Një nga arsyet që ajo vendosi ta hapte studion është përpjekja për ta ringjallur artin në qytetin e Kërçovës. Është e admirueshme se si qasja e saj e gjithanshme krijuese, ka ndikuar që sot prindërit si nga pala shqiptare, por edhe nga pala maqedonase t’i çojnë fëmijët në studion e saj, duke e gjallëruar artin dhe kulturën në Kërçovë.

Së shpejti artistja do të organizojë një ekspozitë me veprat e fëmijëve, që arti që këta fëmijë shpalosin të mund të vlerësohet. Osmani thotë se edhe përpara periudhës së kovidit ka organizuar ekspozita shitëse të suksesshme. Ajo është munduar që çdo vepër e krijuar nga duart e vogëla dhe të arta të fëmijëve të gjejnë vlerësimin e duhur dhe të mund të shitet.

Krijimtaria e penelit dhe vlerësimet e shumta për veprat e saj, artistes i kanë ndihmuar të realizohet edhe në aspektet e tjera të jetës, por ajo cilëson se përmbushja e saj shpirtërore dhe profesionale është realizuar më shumë nga puna e saj e palodhshme me fëmijët, ndërkohë që është mësuese e artit figurativ në shkollën fillore “Rexhë Rushit Zajazi”, në Zajaz.

Shkrirjen e saj mjeshtërore të realizmit me abstraksionin Osmani së shpejti do ta paraqesë në ekspozitën e radhës e cila do të mbahet në Kërçovë. Ndërsa sa u përket planeve për të ardhmen artistja shpreson që mundi i saj të vlerësohet në njërin nga universitet e vendit. Gjithashtu dëshira e saj më e madhe është që diversiteti i veprave të saj përpos që mund të njihet dhe vlerësohet në vende të huaja, të vlerësohet edhe më shumë në vendin tonë.

Një nga veprat e saj që Osmani vlerëson më shumë nga të tjerat është një nga veprat e paraqitura në ekspozitën e Gostivarit në vitin 2021, dedikuar nipit të saj të ndjerë, një imazh që përçon shumë emocione tek njerëzit, dhe që nxjerrë në pah ndjenjën e dhimbjes së artistes.

Osmani shprehet se diçka që do të dëshironte që të servonte më shumë për publikun e gjerë është vetja e saj, që njerëzit të arrijnë ta njohën si është ajo në të vërtet, atë njeriun e buzëqeshur dhe karizmatik që fshihet pas kapelës së artistes së mrekullueshme. “Dua që nëpërmjet veprave të mia t’u tregoj njerëzve ndjenjat që unë kam derdhur ma anë të bojërave”, thotë ajo

Veprat e Lulzimes sot na përqafojnë me efektet e tyre atmosferike, na çojnë në udhëtime vizuale magjepsëse dhe na falin shumë ndjenja të harmonisë dhe dashurisë.

/ms