Bekteshi thotë se ka ulje të çmimeve: “Dilni dhe kontrolloni se si janë çmimet” (VIDEO)

“Unë nuk pretendoj të ju mësoj matematikë juve, por të gjithë qytetarët e dinë se ulje për 10% në 50 denarë është 5 denarë.

Me siguri edhe ju duhet ta dini këtë”, deklaroi Kreshnik Bekteshi, ministër i Ekonomisë.

Edhe pse vazhdimisht paralajmërohej ulje e çmimit të produkteve ushqimore, tani ministri i Ekonomisë, Kreshnik Bekteshi, thotë që qytetarët të mos presin ulje të mëdha të produkteve ushqimore për shkak se ulja prej 7-10 % nuk do të thotë ulje kush e di sa e madhe.

Shpjegoi se ulja e çmimeve tanimë ka filluar dhe se kompanitë kanë nisur të krijojnë çmime të reja të cilët pritet të jenë më të ulëta.

“Prandaj ju lutem, kur themi 7-12%, mos pritni 40 ose 50% ulje, sepse kjo momentalisht është e pamundur që të ndodhë.

Ne në vazhdimësi kemi thënë se ulja do të jetë prej 7-12%. Shihni çmimet si kanë qenë më parë, shihni tani dërgesat e reja nga prodhuesit vendor që e dërgojnë në rrjetin e supermarketeve dhe do të shihni se trendi i uljes ka filluar”, deklaroi Kreshnik Bekteshi, ministër i Ekonomisë.

Edhe pse nuk deshi të i mësoj gazetarët matematikë, megjithatë vazhdoi t’i tregoj përqindjet e uljeve.
“Ulje për 10% në 40 denarë është 4 denarë, 7% është edhe më pak se 4 denarë.

Për këtë gjë, dilni dhe kontrolloni çmimet se si janë sepse nuk janë ashtu siç po i paraqisni ju”, tha Kreshnik Bekteshi, ministër i Ekonomisë.

Bekteshi tha se për të vërejtur uljen e çmimeve të produkteve bazë, fillimisht duhet të harxhohen rezervat që kanë krijuar kompanitë më herët.

“Këto rezerva janë blerë me çmime të ndryshme, rezervat e reja blihen me çmime të tjera që janë më të ulëta se të mëparshmet, që do të thotë se rezervat duhet të harxhohen dhe me siguri do të harxhohen gjatë kësaj jave dhe javës tjetër ose ne fillim të javës tjetër dhe do të vëreni ulje të çmimeve të këta produkte”, nënvizoi Kreshnik Bekteshi, ministër i Ekonomisë.

Bekteshi theksoi se pas kësaj periudhe pritet të veprojë edhe Inspektorati Shtetëror i Tregut për shkak se Ligji për Mbrojtje të Konsumatorëve tani është në fuqi.

VIDEO:

/tv21