“Tradhtia në Bërvenicë”, tensionoi koalicionin qeveritar VMRO-VLEN !

Fitorja e kandidatit të AKI-së në Bërvenicë duket se ka lëkundur besimin e VMRO-DPMNE-së te partneri i saj i preferuar, VLEN-i. Pas shpalljes së rezultateve të mbrëmshme, kryeministri Hristijan Mickoski la të kuptohet se ndjehet i tradhtuar, duke iu referuar historisë së Trojës antike, kur grekët e mashtruan qytetin duke i dhuruar një kalë të madh prej druri, brenda të cilit kishin fshehur ushtarë. Në këtë analogji, në optikën e Mickoskit Bërvenica ishte Troja e VMRO-së që u rrëzua me ndihmën e partnerit VLEN dhe partive tjera opozitare.

“Të vetëm kundër të gjithëve. Ne me program zgjedhor dhe koncept, ata me mbështetjen e demografisë, kartën nacionale dhe ndonjë trojan për të devijuar votat”, shkruan Mickoski.

Fjalorit të këtillë i cili u përdor edhe nga figura tjera të larta të VMRO-së, krahas komunikatës të lëshuar pas mesnatës, i është përgjigjur edhe bashkëkryetari i VLEN-it, Izet Mexhiti. Deklaratat që vijnë nga pallati i bardhë, Mexhiti i quan folklor, ndërsa forcon dozën e kritikës ndaj Mickoskit duke e paralajmëruar se mund të zhgënjehet.

“Në politikë, pozicionimi kundër të gjithëve nuk është strategji që çon drejt suksesit, por një qasje që herët a vonë prodhon zhgënjim. Në demokracitë multietnike nuk guxon të ekzistojë ndarje në ‘ne’ dhe ‘ata’, sepse kjo implikon pabarazi dhe tendenca për të suprimuar tjetrin… Prandaj, nuk kemi pse të merremi me folklorin e zakonshëm postzgjedhor, me arsyetimet dhe interpretimet që u serviren qytetarëve sa herë që rezultatet nuk përputhen me pritshmëritë e dikujt”, shkruan Mexhiti.

Ka reaguar edhe bashkëkryetari Bilall Kasami, ndonëse me jo me tone kritike. Duke e uruar Jahijin dhe duke i bërë thirrje për të punuar të gjithë qytetarët, Kasami thotë se qytetari ka gjithmonë të drejtë, pavarësisht motiveve me të cilat gjykojnë. Reagimit të Mexhitit e Kasamit i kanë paraprirë një fushatë e VMRO-DPMNE-së ku VLEN-in e cilësojnë tradhtar që ka ndihmuar të votojë kandidati shqiptar e jo ai maqedonas.

“Na vjen keq që VLEN-i nuk e shfrytëzoi këtë mundësi të dëshmojë se janë më ndryshe se BDI, por njëjtë sikur LSDM dhe E Majta, mendoj se e luajtën rolin e kalit trojan dhe luajtën për BDI-në”, deklaroi Dafina Stojanovska, Deputete e VMRO-DPMNE-së.

“Na vjen keq që VLEN-i në Bërvenicë e humbi mundësinë të jetë më e ndryshme nga BDI, njëjtë siç u dëshmuan se kandidatët e LSDM-së dhe të Majtës ishin kalë troje në dobi të BDI-së që t’i shpenzojnë votat e trupit votues”, deklaroi Valentin Manasievski, VMRO-DPMNE.

Ndaj këtyre akuzave VLEN-i mbrëmë dërgoi komunikatë të jashtëzakonshme 40 minuta pas mesnatës, por ndonëse i referohen partisë së Mickoskit, ata nuk e përmendën as emrin. VLEN-i pajtohej me qëndrimin e VMRO-së për model qytetar, por ky model sipas tyre nuk ndërtohet me LSDM-në dhe të Majtën.

Nga ana tjetër, është fakt se në Bërvenicë nuk kishte garë mes një koncepti qytetar dhe nacionalist, por votim klasik sipas përkatësisë etnike. Madje, nëse rikthehemi në zgjedhjet e rregullta të vitit të kaluar fitoren e Bërvenicës, VMRO-DPMNE-ja e shpalli si trofe, së bashku me fitoren në Kërçovë. Dhe nga 54 komunat e fituara, kreu i partisë vendosi të festojë pikërisht në këto dy komuna që paraprakisht ishin udhëhequr nga shqiptarët.

Përtej debatit VMRO-VLEN, fitorja në Bërvenicë ka ringjallur debate edhe për Komunën e Butelit.
Duke uruar Arkin Jahijin, Ziadin Sela thotë se tani e ka radhën që shqiptarët ta fitojnë edhe Butelin.
I menjëhershëm ka qenë reagimi i kryetarit Darko Kostovski, i cili thotë se Buteli nuk është gjah, as ka vend për banda që shohin çdo kënd të gjelbër ta transformojnë në ndërtesë./Alsat.mk.

/alsatm