VLEN: Vuçiqi ra, tani duhet të zbardhen lidhjet e familjes Ahmeti me Alta Bankën

Këtë javë, në rajon u mbyll një kapitull politik. Më 25 tetor, Aleksandar Vuçiq pësoi humbje në zgjedhjet në Serbi. Gjashtë ditë më vonë, Banka Popullore e Serbisë ia revokoi licencën bankare Alta Bankës, institucion financiar i lidhur me bashkëpunëtorin e tij të afërt, Davor Macura.

Këto zhvillime janë një moment i rëndësishëm për të rikthyer vëmendjen te lidhjet dhe marrëdhëniet afariste që, sipas dokumenteve të bëra publike nga VLEN-i, kanë ekzistuar ndërmjet strukturave të afërta me pushtetin e Vuçiqit dhe njerëzve të afërt me BDI-në.

BDI sot flet për „Botën serbe“, por faktet dhe kronologjia e ngjarjeve ngrenë pyetje serioze për rolin e saj në këto marrëdhënie.
Në korrik të vitit 2021, kompania serbe MTEL hyri në tregun e Maqedonisë së Veriut. Në atë kohë, BDI ishte pjesë e Qeverisë, ndërsa Bujar Osmani ministër i Punëve të Jashtme. Gjatë asaj periudhe, Osmani zhvilloi të paktën 11 takime me zyrtarë serbë, procesverbale të të cilave ende nuk janë bërë publike.

Më 24 tetor 2024, AS Senjak, kompani e krushkut të Ali Ahmetit, fitoi aksione në Stopanska Banka Bitola nga një kompani e lidhur me Sasho Mijallkovin.
Më 9 qershor 2025, një kompani ku AS Senjak është bashkëpronar mori kredi prej 5 milionë eurosh nga Alta Banka në Beograd.

Më 17 shtator 2025, aksionet iu shitën Alta Bankës. Vetëm gjashtë ditë më vonë, një komunë e udhëhequr nga BDI-ja i dha AS Senjakut dy kontrata me vlerë prej 90 milionë denarësh.

Kjo kronologji kërkon përgjigje të qarta. Nuk mund të mbetet pa u hetuar një zinxhir transaksionesh që përfshin kompani të afërta me figura të larta politike, ish-struktura të pushtetit dhe institucione financiare në Serbi.

VLEN-i i ka ngritur këto çështje që nga shtatori i vitit 2025 dhe dokumentacionin përkatës e ka dorëzuar në Komisionin Shtetëror për Parandalimin e Korrupsionit. Ndërkohë, Ali Ahmeti dhe BDI-ja ende nuk kanë dhënë përgjigje për këto çështje.

Prandaj, kërkojmë:
– Komisioni Shtetëror për Parandalimin e Korrupsionit dhe Prokuroria Publike të hetojnë transaksionet e AS Senjakut me Sasho Mijallkovin dhe Alta Bankën, kredinë prej 5 milionë eurosh dhe kontratat e dhëna nga komunat e udhëhequra nga BDI-ja.

– Institucionet kompetente të kërkojnë nga autoritetet serbe të dhëna për të gjitha lidhjet e Alta Bankës me kompani nga Maqedonia e Veriut.
– BDI-ja të publikojë procesverbalet e takimeve të Bujar Osmanit dhe Ali Ahmetit me Vuçiqin dhe zyrtarë të tjerë serbë.

– Ali Ahmeti personalisht të sqarojë marrëdhëniet afariste të kompanisë së krushkut të tij me Sasho Mijallkovin dhe Alta Bankën, përfshirë kredinë dhe shitblerjen e aksioneve.

Shqiptarët në Maqedoninë e Veriut meritojnë transparencë, përgjegjësi dhe politikë që vepron në interes të tyre.
Zhvillimet në Serbi i bëjnë edhe më të domosdoshme përgjigjet për lidhjet që prej kohësh kërkojnë sqarim. Heshtja nuk mund të jetë përgjigje ndaj pyetjeve që kanë të bëjnë me interesin publik.

/ms