Maqedonia e Veriut dita-ditës po ngulfatet nga korrupsioni…

Ne si partia më e re në skenën politike në Maqedoninë e Veriut, jemi thellësisht të brengosur për lulëzimin e korrupsionit në çdo nivel të pushtetit lokal dhe qendror në vendin tonë.

Korrupsioni këtu është kthyer në normalitet të veprimit dhe të vullnetit dhe nuk përbën më asnjë tabu temë në diskursin e gjerë publik.

Ne të gjithë jemi dëshmitarë të punësimeve pa meritë, por me shuma të majme, që arkëtohen nga punëdhënësit politikë në administratën e shtetit, ne të gjithë jemi dëshmitarë të vizitave mjekësore që paguhen ndërduarsh, ose ndrysh vdes, ne të gjithë jemi dëshmitarë që fajtori, keqbërësi nëpër gjykatat tona del i pafajshëm, kurse viktima e paguan fajin e pabërë, ne të gjithë e shohim përditë e më shumë se të fortit e partisë.

Pavarësisht rrogës që mund të jetë, e shumta, 1000 euro në muaj, disponojnë me ndërtesa, shtëpi milionëshe, toka ndërtimi, llogari të majme bankare, kurse qytetari i rëndomtë vuan për bukën e gojës, punëtori mezi kalon muajin, bizneset po mbyllen, të rinjtë po e braktisin vendin me të madhe, vendi sa vjen e po shkretohet më shumë, demokracia po vritet, liria po cenohet.

Prandaj dhe ne e mbështesim fuqishëm zotimin e ambasadores së re të SHBA-ve në Shkup, zonjën Angela Aggeler në kampanjën e saj për çrrënjosjen e korrupsionit shtetëror në Maqedoninë e Veriut dhe e inkurajojmë fuqishëm të vazhdojë misionin e saj në shpëtimin e demokracisë dhe forcimin e shtetit ligjor.

Gjithashtu, si parti politike, do t’i shërbejmë asaj dhe Shteteve të Bashkuara të Amerikës në këtë mision fisnik për të mirën e të gjithë qytetarëve dhe krijimit të perspektivave për të rinjtë tanë në bazë të njohurive profesionale dhe meritokracisë dhe assesi në bazë të librezës partiake.
Shkruan Dr. Gjyla Çeliku nga partia Levizja Qytetare Evropiane

/ms