Zyrtarët amerikanë: Raketat që goditën Poloninë, janë shkrepur nga forcat ukrainase..

Sipas zyrtarëve amerikanë, gjetjet fillestare sugjerojnë se raketat që goditën Poloninë, janë shkrepur nga forcat ukrainase që po gjuanin një raketë ruse që po hynte në territorin e tyre.

Herët sot, presidenti amerikan Joe Bide tha se raketat që ranë në Poloni, ka gjasa të mos jenë lansuar nga Rusia, transmeton Telegrafi.

Kujtojmë që mbrëmë në territorin e Polonisë kanë rënë dy raketa, ku si pasojë humbën jetën dy persona. Raketat ranë në një fshat, shumë pranë kufirit Ukrainë-Poloni.

Menjëherë pas këtij lajmi kryeministri polak thirri në takim urgjent Këshillin e Sigurisë Kombëtare, për të diskutuar për çështjen e sigurisë.

Në anën tjetër, NATO-ja ka njoftuar se do të mbajë sot takim urgjent me kërkesë të Polonisë, kurse nga mbrëmë Polonia aktivizoi Nenin 4 të NATO-s.

E ministria ruse e Mbrojtjes ka mohuar të jetë e përfshirë në çfarëdo mënyre, në rënien e raketave në territorin e Ukrainë.

Ndërkaq Pentagoni ka thënë se është informuar për raportimet, por se deri më tani nuk ka informacione që mund të mbështesin këto raportime.

E ekspertët ushtarakë polakë menjëherë pas shpërthimit kanë shkuar në vendin e ngjarjes, për të përcaktuar se për çfarë lloj arme bëhet fjalë dhe kujt i përket.

/Telegrafi/