Në vendin që edhe Zoti e ka braktisur.. Nga Arbër Çeliku

Dua t’i shkruaj ca vargje
Të thjeshta
Pa asnjë dozë kritikuese
As të lumtura dhe as mallëngjyese
Ashtu siç dhe e kemi të tashmen
Në të cilën jetojmë

Kë të kritikoj?!
Intelektualët shurdhmemecë
Që temena i bëjnë prore Dovletit?!
Apo gazetarët
Që profesionin e tyre e kanë kthyer në prostitucion politik?!
Mos vallë politikanët
Që kanë gjetur budallenj si ne
Dhe shfryjnë ndjenjat e tyre të harlisura?!

Jo, jo
S’dua ta ndërndyej lapsin
Me servilë e puthadorë
Nuk jam unë Migjeni
Ta fshikulloj mjerimin

Dua të shkruaj ca vargje për jetën
Rri e mendoj dhe e pyes veten:
Për cilën jetë?!
A ka jetë në një vend
Që edhe Zoti e ka braktisur?!

Poezi shkruar nga Dr. Arbër Çeliku
Fotografia në portal është përzgjedhje e redaksis ska të bëjë me autorin

/kercova.net