Qani Mehmedi (1953 – 2017), gazetari që e ktheu fjalën e lirë në mision kombëtar

Qani Mehmedi lindi më 12 mars 1953 në Drogomisht të Vogël, Kërçovë, Republika e Maqedonisë së Veriut. Shkollën fillore e kreu në vendlindje, Gjimnazin në Tetovë, kurse studimet për gazetari – diplomaci, për shkencat juridike dhe ato albanologjike i bëri në Universitetin e Prishtinës. Diplomoi në Drejtësi në Universtitetin e Prishtinës dhe magjistroi në Shkencat politike (Marrëdhëniet ndërkombetare – diplomaci) në Universitetin Ndërkombëtar të Strugës. Ndoqi kurse për gjuhën dhe civilizimin freng në Paris dhe Antibe të Francës. Punoi gazetar dhe redaktor në gazetat “Bota e re” dhe “Zëri i Rinisë”. Punoi gjithashtu redaktor në Televizionin e Prishtinës, në Radio Zagreb dhe Radio – Televizionin Shqiptar (TVSH).

Ishte sekretar shkencor i revistës “Dituria”.
Pas luftës së Kosovës punoi redaktor në Radio Televizionin e Kosovës, kryeredaktor i të përditshmes “Lajm”, dhe së fundmi redaktor në Radio Kosova.
Është laureat i vetëm në Kosovë i çmimit për gazetari “Jusuf Gërvalla dhe Kadri Zeka” që e ndau Kuvendi i Republikës së Kosovës (1997), gazetar i vitit në revistën “Zëri i Rinisë”, Punëtor i dalluar i “Rilindjes”, ndërsa ka marrë edhe një varg mirënjohjesh e shpërblimesh të tjera.

Ka të botuara me qindra kolumne editoriale, intervista dhe artikuj publicistikë në gazetat e Prishtinës, Tiranës, Shkupit, Zagrebit dhe Sarajevës si dhe autor i qindra reportazheve dhe dokumentarëve televizive.
Ka botuar studimin “Shtetformimi i Kosovës 1968 -2008”, në vitin 2011.
Poashtu në vitin 2015 botoi librin “ME GJURMËMËDHENJTË E KOSOVËS” në Prishtinë.

Qani Mehmedi ka qenë dhe mbetet dëshmi e gjallë e historisë së Kosovës në më shumë se 40 vite (1980 – 2017). Ai ishte dëshmitar aktiv, bartës e përcjellës, veprues e meditues, ndikues e i ndikuar nga çdo ditë e historisë së Kosovës.
Qani Mehmedin do t’a kujtojmë si një gazetar i jshtëzakonshëm dhe për një intelektual të kompletuar.
Shkruan: Dr.sc. Kujtim Kasami

/tvgurra