Ma lirë! Zviceranët nuk kanë ngrënë kurrë kaq shumë pula ?

Zvicra e adhuron mishin e pulës. Popullsia konsumon 83% më shumë se 25 vite më parë, ose 16,5 kilogramë për person në vit, sipas organizatës “Proviande”. Kjo rritje nxit interesin e rrjeteve të ushqimit të shpejtë dhe të shitësve të mëdhenj me pakicë, por njëkohësisht krijon sfida sa i përket furnizimit dhe mirëqenies së kafshëve.

Mishi i pulës është tashmë lloji i dytë më i preferuar i mishit për popullsinë zvicerane, pas mishit të derrit. Bëhet fjalë për një rritje të ndjeshme, ndërkohë që konsumi i të gjitha llojeve të tjera të mishit ka rënë ose ka mbetur në vend gjatë së njëjtës periudhë. Suksesi i tij shpjegohet veçanërisht përmes rrjeteve sociale, ku mishi i pulës shfaqet herë si zgjedhja kryesore e atletëve dhe herë si produkti i preferuar i ushqimit të shpejtë, veçanërisht në variantin krokant (“crousty”). Çmimi i përballueshëm dhe fakti që mund të konsumohet nga të gjitha besimet fetare kontribuojnë gjithashtu në këtë sukses.

Prodhimi zviceran nën presion
Megjithatë, oferta nuk arrin të ndjekë ritmin e kërkesës. Prodhimi vendas mbulon vetëm 62% të konsumit. Për krahasim, shkalla e vetëfurnizimit arrin në 97% për mishin e viçit dhe 95% për mishin e derrit, sipas Bashkimit Zviceran të Fermerëve (USP).

Vitin e kaluar, Zvicra importoi gati 50.130 tonë mish pule, një e treta e të cilit vinte nga Brazili. Por, në fillim të shtatorit, Zvicra pezulloi importet e mishit brazilian, si një masë paraprake kundër përdorimit të antibiotikëve. Rrjetet “Migros” dhe “Coop” kanë njoftuar se mund ta kompensojnë mungesën me shpendë nga Evropa. Megjithatë, çmimet mund të rriten në javët në vijim.

A po mbetet Zvicra pas në çështjet e mirëqenies së kafshëve?
“Ross 308”, një racë me rritje të shpejtë, përbën 90% të mishit të pulës që konsumohet në Zvicrë. Shoqatat për mbrojtjen e kafshëve denoncojnë këtë lloj rritjeje, e cila shkakton vuajtje për pulat. Në Evropë, një standard mirëqenieje i njohur si “European Chicken Commitment” (ECC) ndalon përdorimin e këtyre racave me rritje të shpejtë.

Gati 400 kompani e kanë nënshkruar këtë angazhim, si për shembull KFC, Burger King, Lidl France, Aldi France apo grupi LDC, prodhuesi më i madh i mishit të pulës në Evropë. Megjithatë, në Zvicrë, asnjë shitës i madh me pakicë nuk është angazhuar në këtë drejtim, pikërisht për shkak të çështjes së racës së pulave.

Por mirëqenia e kafshëve varet edhe nga faktorë të tjerë, siç janë kushtet e mbarështimit, të cilat në Zvicrë janë ndër më të rrepta në botë.

Migros ndërmerr një ndryshim
Duke filluar nga ky shtator, e gjithë marka Optigal – e cila përbën 40 deri në 50% të shitjeve totale të mishit të pulës në Migros – do të kalojë te një racë pulash me rritje më të ngadaltë. Këto pula do të jetojnë mesatarisht 42 ditë, në vend të 35 ditëve që jeton raca Ross 308. Ky ndryshim vjen një vit pas publikimit, nga organizata “Observatoire du spécisme”, të pamjeve të filmuara me kamera të fshehtë në një fermë të Micarna-s në kantonin Vaud; pamjet tregonin pula që çalonin dhe që dukeshin se vuanin nga probleme me peshën dhe lëkurën, raporton RTS, transmeton albinfo.ch.

Kalimi te racat me rritje më të ngadaltë nënkupton më pak prodhim vendas dhe më shumë importe. Migros njofton se synon të stabilizojë apo edhe të rrisë prodhimin zviceran të mishit të shpendëve. Grupi ka bërë gjithashtu një thirrje: kërkon 50 ferma të reja të gatshme për të nisur mbarështimin e pulave. Megjithatë, duke pasur parasysh rregulloret për planifikimin hapësinor, kjo sipërmarrje pritet të jetë e vështirë.

/albinfo