Zvicra rrëzon nismën për neutralitet të rreptë, rreth 70% votojnë kundër !

Qytetarët zviceranë kanë votuar kundër nismës për vendosjen e një neutraliteti më të rreptë në Kushtetutë. Rreth 70 për qind e votuesve e kanë refuzuar propozimin në referendumin e mbajtur në vend.

Nisma synonte kufizimin e bashkëpunimit ndërkombëtar të Zvicrës dhe ndalimin e masave ekonomike ndaj shteteve që janë përfshirë në luftë. Sipas propozuesve, Zvicra duhej të lejonte vetëm sanksione të miratuara nga Kombet e Bashkuara dhe të kufizonte bashkëpunimin me aleancat e mbrojtjes, përveç rasteve kur vendi sulmohet ose përballet me kërcënim të drejtpërdrejtë.

Debati për neutralitetin është intensifikuar pas vitit 2022, kur qeveria zvicerane vendosi të zbatojë në masë të madhe sanksionet e Bashkimit Evropian kundër Rusisë pas pushtimit të Ukrainës.

Nisma mbështetej nga grupi „Pro Schweiz“, i afërt me Partinë Popullore Zvicerane (SVP), ndërsa kundërshtarët argumentuan se një neutralitet i tillë do ta kufizonte bashkëpunimin ndërkombëtar dhe do ta dëmtonte reputacionin e Zvicrës.

Neutraliteti zviceran është ndër shtyllat tradicionale të politikës së jashtme të vendit dhe është i njohur ndërkombëtarisht që nga viti 1815. Zvicra nuk është anëtare e NATO-s dhe tradicionalisht qëndron jashtë aleancave ushtarake.

/ (INA)