Eskalon situata! Houthit godasin Izraelin me ra’keta nga Jemeni

Për herë të parë që nga fillimi i luftës, rebelët Houthi nga Jemeni kanë lëshuar një raketë drejt territorit izraelit, duke rritur ndjeshëm tensionet në Lindjen e Mesme dhe duke sinjalizuar hapjen e mundshme të një fronti të ri në konfliktin rajonal.

Sipas ushtrisë izraelite, raketa është lëshuar nga zonat e kontrolluara nga Houthit, të mbështetur nga Irani, dhe ka pasur si objektiv jugun e Izraelit. Sistemet e mbrojtjes ajrore janë aktivizuar menjëherë, ndërsa sirenat e alarmit janë dëgjuar në qytetin e Beershevës dhe zonat përreth. Deri më tani nuk raportohet për viktima apo dëme të konsiderueshme materiale.

Sulmi është konfirmuar disa orë më vonë edhe nga vetë Houthit, të cilët e cilësuan si kundërpërgjigje ndaj goditjeve izraelite në objektiva iraniane dhe në rajone të tjera, përfshirë Libanin, Irakun dhe Bregun Perëndimor.

Ata paralajmëruan se operacionet do të vazhdojnë deri në arritjen e objektivave të tyre, ndërsa zhvillimi vjen në një moment të ndjeshëm, kur Irani ka sinjalizuar mundësinë e veprimeve në Ngushticën strategjike Bab al-Mandab, një korridor kyç për tregtinë globale.

Ekspertët paralajmërojnë se përfshirja aktive e Houthive mund të thellojë më tej krizën, duke rritur rrezikun për tregtinë ndërkombëtare dhe furnizimin me naftë, teksa konflikti po merr gjithnjë e më shumë përmasa rajonale dhe globale.

/tv21