Rasti “Lotaria”: Grubi në arrest shtëpie, Prokuroria pa detaje për hetimin ?

Prokuroria Themelore Publike është e mbyllur hermetikisht kur bëhet fjalë për çështjen e Artan Grubit, ish zëvendëskryeministrit të parë i cili pas 14 muajsh arrati më 23 shkurt u rikthye në Maqedoni. Organi i akuzës nuk ofron të dhëna nëse e ka njoftuar Artan Grubin me të gjitha provat që i posedon dhe kur pritet që hetimi të përfundojë apo të ngrihet akuza. Pyetjes së Alsat nëse do të bëhet vlerësim i ri për çështjen e sigurisë së Grubit, Prokuroria i përgjigjet me fjalët “nuk mundemi të ndajmë detaje në këtë fazë”.

Grubi prej mbrëmjes së 23 shkurtit ndodhet në arrest shtëpie, pasi me propozim të Prokurorisë, Gjykata pranoi masën për sigurimin e pranisë. Për këtë pati reagime të ashpra në opinion, duke kritikuar autoritetet pse nuk kanë caktuar masë paraburgimi efektiv, duke e pasur parasysh se Grubi ka qenë në arrati. Arsyetimi i organit të akuzës ishte se Agjencia për Siguri Kombëtare dhe Ministria e Punëve të Brenda disponojnë me informata se Grubit i rrezikohet siguria nëse dërgohet në burgun e Shutkës edhe pse drejtori i Burgut asokohe theksoi se siguria është në nivelin më të lartë të mundshëm.

Prej dhjetorit të vitit 2024 Grubi zyrtarisht ndiqet për veprën penale “Mashtrim në shërbim” së bashku me drejtorin e Lotarisë Shtetërore Përparim Bajrami dhe disa persona të tjerë për furnizimin e VLT aparateve për Lotarinë Shtetërore edhe pse të njëjtat fare nuk kanë qenë të nevojshme dhe asnjëherë nuk janë përdorur.

Dëmi sipas Prokurorisë është mbi 8 milionë euro, ndërsa për veprën parashikohet dënim me burg prej së paku 4 vjet. Hetimet në lotari u hapën pasi SHBA, e futi në listë të zezë Artan Grubin së bashku me gjyqtarin kontrovers Enver Bexheti të cilët sipas autoriteteve amerikane kishin marrë ryshfet për ta shpëtuar nga ndjekja penale ish shefin e Policisë Sekrete, Sasho Mijallkov.

/alsatm