Itali, mbi një milion protestues kundër rritjes së çmimeve !

Italia u përfshi nga protesta masive në 70 qytete, në kuadër të një greve të përgjithshme 24-orëshe të thirrur nga sindikata USB. Sipas organizatorëve, mbi 1 milion persona dolën në rrugë kundër rritjes së kostos së jetesës, pagave të ulëta dhe shtimit të shpenzimeve ushtarake.

Italia është përfshirë nga një valë protestash masive dhe një grevë e përgjithshme 24-orëshe, që ka paralizuar qarkullimin në akset kryesore rrugore, transportin urban dhe portet detare. Sipas sindikatës organizatore USB, mbi një milion qytetarë dolën në rrugë në rreth 70 qytete të vendit, për të protestuar kundër rritjes së kostos së jetesës, pagave të ulëta dhe rritjes së shpenzimeve për armatim.

Protestat u shoqëruan me tensione. Në Romë, Milano, Torino dhe qytete të tjera pati përplasje mes qytetarëve dhe policisë. Në kryeqytet, protestuesit hodhën sende në drejtim të forcave të rendit, ngritën barrikada dhe tentuan të çajnë kordonin policor për t’iu afruar Parlamentit. Tetë persona u arrestuan gjatë protestave në Romë.

Në grevë u përfshinë edhe punëtorët e porteve kryesore detare të Italisë. Në Xhenova, protestuesit bllokuan hyrjen e portit, në shenjë kundërshtimi ndaj transportit të armëve dhe pajisjeve ushtarake.

Protesta mori përmasa ndërkombëtare, pasi sindikatat nga Italia, Franca, Spanja, Greqia, Turqia dhe Maroku u bashkuan në nismën për bojkotimin e anijeve që transportojnë ngarkesa ushtarake në më shumë se 100 porte.
“Portet nuk mund dhe nuk duhet të përdoren për transportin e armëve, municioneve, pajisjeve ushtarake dhe trupave. Punëtorët e porteve nuk punojnë për luftën”, theksohej në qëndrimin e tyre të përbashkët, ku kërkohej ndalimi i menjëhershëm i konfliktit në Gazë dhe Lindjen e Mesme.
Përfaqësuesi i sindikatës USB në rajonin e Lombardisë thotë se bllokadat janë mënyrë për të kundërshtuar politikat e luftës dhe riarmatimit.

“Për ne, bllokimi i unazës rrugore shërben për të riafirmuar fuqinë e sloganeve të grevës së sotme: kundër kostos së lartë të jetesës, kundër luftës dhe kundër riarmatimit. Bllokimi i kësaj hapësire ka edhe një domethënie simbolike: rimarrjen e një hapësire publike në një shtet që beson se gjithçka mund të zgjidhet përmes represionit, luftës dhe riarmatimit”, deklaroi Pietro Cusimano, përfaqësues i Sindikatës USB.

Në protesta morën pjesë edhe studentë dhe të rinj, të cilët iu bashkuan punëtorëve në kërkesat për kushte më të mira jetese dhe më shumë siguri për të ardhmen.
Atmosferë

“Për ne, kjo është një hapësirë ku brezi ynë mund të ngrejë zërin para institucioneve. Si studentë dhe të rinj, ndodhemi në një situatë të pasigurt dhe nuk arrijmë ta shohim të ardhmen. Kërkojmë përgjigje, ndihmë dhe vëmendje të sinqertë ndaj problemeve tona. Qiratë e larta dhe kostoja e jetesës na prekin të gjithëve. Prandaj duam të bashkojmë forcat me punëtorët dhe të luftojmë së bashku për këtë kauzë të përbashkët”, tha Bianca Albertini, studente universitare.

Greva përfshiu edhe sektorin shëndetësor, megjithatë u garantua ofrimi i shërbimeve të domosdoshme dhe i ndihmës urgjente në spitale.

/ts