Ekonomia maqedonase në prag kolapsi ?

Zëvendëskryeministri dhe ministri i Transportit, Aleksandar Nikolloski, ka paralajmëruar se rregullat e reja të Shengenit për hyrjen e shoferëve profesionistë në BE rrezikojnë seriozisht ekonominë maqedonase dhe atë rajonale. Ai tha se ky problem do të godasë drejtpërdrejt sektorin e transportit, eksportuesit dhe stabilitetin ekonomik, duke i bërë kompanitë jokonkurruese në tregun evropian.

Nikolloski theksoi se rritja e kostove të transportit me 3–5% mund të detyrojë kompanitë të largohen nga vendi dhe se prodhimi në Zonat Industriale, i orientuar 100% drejt eksportit, do të preket rëndë. Ai njoftoi se nga e hëna pritet një protestë shtatëditore në vendkalimet kufitare drejt Shengenit, me pjesëmarrjen e transportuesve nga disa vende të Ballkanit.

Sipas tij, BE-ja po tregohet burokratike dhe po injoron problemet e Ballkanit Perëndimor, ndërsa zgjidhja duhet të vijë përmes shtyrjes së sistemit elektronik ose krijimit të një modeli për viza pune për shoferët profesionistë.

/ts