Aktivitetet e realizuara pas përmbytjeve në Kërçovë nga Kryqi i Kuq

Si pasojë e reshjeve të dendura të shiut dhe daljes nga shtrati të rrjedhave ujore të lumit Zajaska, në rajonin e Kërçovës ndodhën përmbytje që shkaktuan dëme të konsiderueshme materiale dhe nevojë për një përgjigje të menjëhershme humanitare.

Kryqi i Kuq i RMV-së u përfshi menjëherë në përgjigjen humanitare me ekipin për reagim ndaj fatkeqësive dhe vullnetarët, me qëllim sigurimin e një përgjigjeje të shpejtë, efikase dhe cilësore ndaj situatës. Në bashkëpunim me Komunën e Kërçovës dhe institucionet kompetente, u veprua vazhdimisht në terren për një periudhë prej tetë ditësh. Organizata komunale e Kryqit të Kuq Kërçovë u caktua si bartëse e logjistikës së të gjithë përgjigjes humanitare, përfshirë edhe aktivitetet që lidhen me evakuimin, strehimin, grumbullimin dhe shpërndarjen e ndihmës humanitare.

Në fazën fillestare të ndërhyrjes u evakuuan rreth 110 persona, të cilët u strehuan në sallën sportive “Hristo Uzunov” në Kërçovë. Me përkeqësimin e situatës dhe rritjen e përmasave të përmbytjeve, numri i përgjithshëm i personave të prekur dhe të strehuar u rrit në 185 persona. Gjatë gjithë periudhës së strehimit, personave të evakuuar iu sigurua ndihmë bazë humanitare, e cila përfshinte: strehim, ushqim, ujë, vakte të ngrohta, dyshekë, batanije dhe mjete bazë higjienike, në koordinim me pushtetin lokal dhe aktorët e tjerë relevantë.

Gjatë dy ditëve të fundit, një pjesë e personave të evakuuar filluan gradualisht të kthehen në shtëpitë e tyre, në përputhje me përmirësimin e gjendjes së sigurisë në terren. Paralelisht me këtë, filloi aksioni për pastrimin e objekteve shtëpiake të përmbytura dhe sanimin e pasojave të përmbytjeve. Në këto aktivitete u përfshinë Armata e Republikës së Maqedonisë së Veriut, Ndërmarrja Publike Komunale, si dhe vullnetarët e Kryqit të Kuq, të cilët me angazhimin e tyre dhanë një kontribut të rëndësishëm në terren.

Kryqi i Kuq i RMV-së, gjatë gjithë periudhës, ishte vazhdimisht i pranishëm në terren me ekipin për reagim ndaj fatkeqësive dhe vullnetarët, ndoqi situatën e popullatës së prekur dhe veproi në përputhje me nevojat e identifikuara, në koordinim të ngushtë me Shtabin e Krizës të Komunës së Kërçovës, institucionet dhe shërbimet e përfshira në përballimin e përmbytjeve. Përgjigjja humanitare vazhdon në përputhje me zhvillimin e situatës në terren dhe nevojat reale të popullatës së prekur nga përmbytjet.

/ms