Shoqatat e gjuetarëve Eko Fazan dhe Sokol Z ruajnë faunën e egër në rajonin e Kërçovës

Shoqatat e gjuetarëve Eko Fazan dhe Sokol Z, të njohura për angazhimin e tyre në mbrojtjen e natyrës dhe mjedisit, kanë nisur një iniciativë të rëndësishme për studimin dhe monitorimin e faunës së egër në rajonin e Kërçovës.

Përmes përdorimit të kamerave-kurth, ata po evidentojnë speciet që jetojnë në rrethinën tonë, duke konstatuar edhe rritjen e ndjeshme të numrit të kafshëve të egra. Sipas të dhënave, në rajon është shtuar veçanërisht numri i kaprollëve, lepujve dhe arinjve, ndërsa është evidentuar edhe rrëqebulli – një nga speciet më të rralla në Ballkan.

Në rajonin e Kërçovës shoqata Eko Fazan ka regjistruar 7 rrëqebuj, ndërkohë që në gjithë vendin numri i tyre vlerësohet rreth 20. Kjo dëshmon për ruajtjen e mirë të natyrës dhe pasurinë e madhe me egërsira dhe burime ushqimore.

Një kontribut të veçantë në këtë drejtim ka dhënë edhe Betim Çadari, adhurues i natyrës dhe hulumtues i kafshëve të egra, i cili vitin e kaluar realizoi një dokumentar për natyrën dhe për “shqiponjën e artë” – një nga speciet më të vështira për t’u incizuar. Për këtë punë, ai u shpërblye nga shoqata “Votra” me çmim për fotografimin e natyrës me kreativitet artistik

/votra.info