URIME: Kirurgu shqiptar nga Kërçova, Ass. Dr. Burim Elezi, përfundon me sukses subspecializimin në kirurgjinë abdominale

Kirurgu i njohur shqiptar, Ass. Dr. Burim Elezi, ka shënuar një tjetër arritje në karrierën e tij profesionale, duke përfunduar me sukses të lartë subspecializimin në fushën e kirurgjisë abdominale. Gjatë kësaj periudhe të rëndësishme të zhvillimit profesional, ai ka qenë nën mentorimin e Prof. Dr. Rexhep Selmanit, një emër i njohur në përgatitjen e kuadrove të rinj mjekësorë.

Komisioni për vlerësim, i përbërë nga Prof. Dr. Zoran Karaxhov (kryetar), Prof. Dr. Rexhep Selmani dhe Prof. Dr. Ognen Kostovski, e vlerësoi lart përgatitjen profesionale dhe angazhimin e Dr. Elezit.

I lindur në Kërçovë, Dr. Elezi ka ndjekur shkollimin fillor në vendlindje, ndërsa arsimin e mesëm e ka ndjekur në gjimnazin amerikan “Nova” në Shkup (1998–2002). Studimet në Fakultetin e Mjekësisë në Shkup i ka përfunduar në vitin 2009, ndërsa specializimin në kirurgji të përgjithshme në vitin 2017.

Përvoja e tij ndërkombëtare dhe përkushtimi i vazhdueshëm ndaj përgatitjes akademike e profesionale e bëjnë atë një nga figurat më të respektuara në fushën e kirurgjisë në rajon. Që nga viti 2011, ai punon në Klinikën Universitare për Sëmundje Kirurgjikale “Shën Naumi i Ohrit” në Shkup.

/tvgurra