Taravari: Kosovës i nevojitet Kurti që të vazhdojë edhe katër vite qeverisje..

Ministri i Shëndetësisë, Arben Taravari dhe lider i Aleancës për Shqiptarët i ka vlerësuar si të mira rezultatet që mori Lëvizja Vetëvendosje e kryeministrit aktual Albin Kurti në zgjedhjet parlamentare në Kosovë dhe shprehu pritshmërinë që ai të drejtojë qeverinë e ardhshme në mënyrë të pavarur ose në koalicion me një nga partitë që hyjnë në Parlament

“Rezultatet të mira, rreth 42-43 për qind, plus duhet të numërohen votat e dasporës. Pritshmëritë e tyre janë rreth 45 për qind, dhe shpresoj që do të formojnë një qeveri të pavarur. Edhe nëse nuk e bëjnë, mendoj se me koalicion me siguri z. Albin Kurti (do ta udhëheqë qeverinë), sepse ka besimin më të madh se të gjithë. Partia e dytë dhe e tretë së bashku kanë më pak vota se z.Kurti. Kosovës i nevojitet z.Kurti të vazhdojë edhe katër vite qeverisje”, tha Taravari në pyetjen e gazetarëve për rezultatet e zgjedhjeve në Kosovë pas lëshimit të përdorimit të stacionit të ri të kompresorit për klinikat kirurgjike.

Sipas të dhënave më të reja të Komisionit Qendror të Zgjedhjeve në Kosovë, bazuar në 88 për qind të votave të numëruar, në zgjedhjet e djeshme parlamentare udhëheq Vetëvendosja me 41,29 për qind të votave. Në vendin e dytë është Partia Demokratike e Kosovës me 21,83 për qind, ndërsa në vendin e tretë Lidhja Demokratike e Kosovës me 17,74 për qind të votave. Në vendin e katërt ndodhet Aleanca për Ardhmërinë e Kosovës me 7,68 për qind të votave.

Dita e zgjedhjeve e cila kaloi pa asnjë incident, mbetet nën hijen e dështimit të Komisionit Qendror të Zgjedhjeve për të shpallur në kohë reale rezultatet e zgjedhjeve për partitë politike. Edhe pse Ligji i ri zgjedhor parasheh shpalljen e rezultateve preliminare të partive në kohë rekord, kjo nuk ndodhi.

Për të formuar qeverinë, Vetëvendosja e udhëhequr nga Kurti, duhet të sigurojë 61 deputet në Kuvendin e Kosovës dhe deri tani mbetet e hapur se me cilën parti politike që futet në Kuvend do të bëjë koalicion.

/koha.mk