“Vrasës me pagesë” nga Maqedonia arrestohet në Serbi, po hetohet se kush duhej të ishte shënjestra!

Policia serbe ka arrestuar një shtetas të Maqedonisë në territorin e Pribojit, nën dyshimin se kishte hyrë në Serbi si ekzekutor i angazhuar për kryerjen e një vrasjeje me porosi, raportoi “Telegraf.rs”, duke iu referuar informacioneve nga hetimi.

Për momentin nuk dihet se kush duhej të ishte objektivi i likuidimit të planifikuar.
Sipas medias, i dyshuari në evidencat policore thuhet se figuron si vrasës me pagesë që punonte për klanin Kavaç, ndërsa është lidhur edhe me një tentativë të mëparshme për vrasjen e Marko Ljubisha Kan.

Këto pretendime deri më tani nuk janë konfirmuar zyrtarisht nga Ministria e Punëve të Brendshme e Serbisë, sipas informacionit të transmetuar nga media.
“Telegraf.rs” gjithashtu shkruan se të dyshuarit, për likuidimin e planifikuar, thuhet se i ishte paguar paraprakisht një shumë e konsiderueshme parash, por shuma e saktë nuk dihet.

Pas marrjes së informacioneve operative për praninë e një të dyshuari të rrezikshëm, policia serbe angazhoi forca të shtuara dhe bllokoi zonën në Priboj.

Hetimi tani është përqendruar në përcaktimin e identitetit të personit që duhej të ishte objektivi, si dhe në zbulimin e lokacioneve dhe personave që mund t’i kenë ofruar mbështetje logjistike pas hyrjes së tij në Serbi.

Të dyshuarit i është caktuar masa e ndalimit deri në 48 orë, pas së cilës, së bashku me kallëzimin penal, pritet të dalë para prokurorisë kompetente.
Në këtë fazë bëhet fjalë për dyshime dhe informacione mediatike që lidhen me një hetim në vazhdim, ndërsa fajësinë mund ta përcaktojë vetëm gjykata.

/ms