Zvicër, 140 km/h në zonë 60, kosovari goditi për vdekje çiklisten, dënohet me 7 vjet burg !

Njëri nga të dënuarit është një shtetas i Kosovës, atëherë 33 vjeç, ndërsa tjetri një 22-vjeçar franko-zviceran. Sipas gjykatës, dy burrat kishin nisur një garë pak para orës 02:00 të mëngjesit dhe kishin ndjekur njëri-tjetrin për rreth dy kilometra.

Gjykata ka vlerësuar se të dy ishin të vetëdijshëm për rrezikun që po krijonin me mënyrën e tyre të vozitjes.Kosovari, duke lëvizur me rreth 140 kilometra në orë në një pjesë të rrugës ku kufizimi ishte 60 km/h, goditi për vdekje një çikliste 31-vjeçare me shtetësi spanjolle. Nga fuqia e goditjes, viktima u hodh rreth 48 metra larg.

Sipas vendimit, garuesi tjetër kishte ngadalësuar ose frenuar pak para përplasjes, por gjykata vlerësoi se ai kishte pasur synim ta vazhdonte garën dhe për këtë arsye u konsiderua bashkëkryes.

Të dy u dënuan me nga shtatë vjet burg, ndërsa nga dënimi do t’u llogariten ditët e kaluara në paraburgim, përkatësisht 189 ditë për njërin dhe 153 ditë për tjetrin.Gjykata vendosi gjithashtu që shtetasi i Kosovës, pas përfundimit të dënimit, të dëbohet nga Zvicra për pesë vjet.

Sipas gjykatës, 33-vjeçari ishte përplasur edhe më herët me një automjet që po lëvizte në drejtim të kundërt, duke plagosur një pasagjer. Kryetari i trupit gjykues ka thënë se ky person kishte shpëtuar “falë fatit të mirë” dhe se vazhdon të përballet me pasoja psikologjike nga ngjarja.Prokuroria kishte kërkuar dënime më të larta, përkatësisht nëntë dhe tetë vjet burg. Si Prokuroria, ashtu edhe mbrojtja e 22-vjeçarit, kanë paralajmëruar se do ta apelojnë vendimin.

/Urgjent