Vuçiç: Ja pse Putin dëshiron që unë të jem kryeministër i Serbisë ?

Rajoni dhe Bota

Vuçiç tha se një ndryshim në qeveri do të nënkuptonte një ndryshim në kursin e politikës së jashtme të Serbisë, që sipas tij përkthehet në sanksione kundër Rusisë dhe njohje të pavarësisë së Kosovës…

Kryetari i listës “Serbia e Bashkuar”, Aleksandar Vuçiç, deklaroi sot në një tubim elektoral se zgjedhjet parlamentare të planifikuara për 25 tetor janë vendimtare dhe theksoi se dëshiron një fitore bindëse.

“Dua që t’i mposhtim me gjysmë milioni vota, që të jetë bindëse dhe që të jemi në gjendje të bëjmë gjithçka për të cilën ramë dakord”,tha Vuçiç në një tubim elektoral në Zrenjanin.

Vuçiç shtoi se qytetarët po zgjedhin nëse do ta qeverisin vendin ata apo dikush nga jashtë, duke nënkuptuar se pas listës së studentëve fshihen vendet perëndimore.

“Ata u përpoqën të përmbysnin shtetin tonë, të shkatërronin të gjitha vlerat tona, të ndanin familjet tona, t’i kthenin fëmijët kundër prindërve të tyre. Ajo që kërkoj nga ju është që të jemi të disiplinuar, të jemi të përgjegjshëm, ta përfundojmë këtë fushatë të mrekullueshme pa dështuar dhe t’i mposhtim ata”, tha Vuçiç.

Vuçiç përsëriti pretendimin se një votë për Listën e Studentëve do të thotë mbështetje për faktorët e huaj.
“Nëse doni që dikush nga jashtë të qeverisë, atëherë votoni për plenumet. As nuk e dini se kush është kandidati për çfarë. Të gjithë kuadrot e ndotura të DOS-it, që shkatërruan vendin. Ata i vunë njerëzit më të korruptuar në listë për të na shpjeguar se si duhet të duket shteti“, vlerësoi Vuçiç.

Duke deklaruar se e kreu funksionin e Presidentit të Serbisë në interes të qytetarëve, Vuçiç tha se nuk u gjetën llogari të tij jashtë vendit, që do të thotë se ai u shërbeu me besnikëri qytetarëve.

“Pse mendoni se Presidenti rus Vladimir Putin tha se shpreson që unë të jem kryeministër? Sepse ai e di gjithashtu se unë po them të vërtetën”, tha Vuçiç.

/ts