Urime: Kërçovës i shtohet edhe një doktor shkence – Dr. Safet Rika mbron me sukses të lartë disertacionin e doktoratës

Qyteti i Kërçovës është pasuruar edhe me një emër të ri në radhët e doktorëve të shkencës. Inxhinieri dhe pedagogu kërçovar, Dr. Safet Rika, mbrojti me sukses të lartë disertacionin e doktoratës me titull “Analiza dhe modelimi i besueshmërisë së sistemit transportues të qymyrit në minierat sipërfaqësore”, në Fakultetin Teknik në Manastir.

Punimi i doktoratës u realizua nën mentorimin e Prof. Dr. Elizabeta Hristovska, ndërsa mbrojtja u zhvillua para komisionit të përbërë nga Prof. Dr. Silvana Angelevska, kryetare e komisionit, si dhe anëtarët Prof. Dr. Sonja Çalamani, Prof. Dr. Ivo Kuzmanov dhe Prof. Dr. Sevde Stavreva.

Në këtë moment të rëndësishëm akademik, të pranishëm ishin edhe familjarë, miq dhe bashkëpunëtorë të Dr. Rikës, të cilët ndanë gëzimin dhe krenarinë për arritjen e tij.

Dr. Safet Rika është i diplomuar në Inxhinieri Elektrike dhe Kompjuterike në Fakultetin e Elektroteknikës të Universitetit të Prishtinës. Studimet e magjistraturës i përfundoi në fushën e Inxhinierisë Grafike në Fakultetin Teknik në Manastir, pranë Universitetit “Shën Kliment Ohridski”, ndërsa studimet e doktoratës i ndoqi në programin Inxhinieri Industriale dhe Menaxhment në të njëjtin universitet.

Aktualisht, ai ushtron detyrën e mësimdhënësit në SHMK “DRITA” në Kërçovë, ku jep një kontribut të çmuar në edukimin dhe aftësimin profesional të nxënësve në drejtimin e elektroteknikës. Gjatë karrierës së tij akademike, për tre semestra ka qenë i angazhuar si ndihmës në procesin mësimor në programin e Mekatronikës në Fakultetin e Shkencave të Zbatuara pranë Universitetit të Tetovës.

Përveç angazhimit në arsim, Dr. Rika është aktiv edhe në sektorin industrial, duke kontribuar në vënien në funksion dhe mirëmbajtjen e sistemeve dhe pajisjeve industriale. Ai është autor dhe bashkautor i disa punimeve shkencore të publikuara dhe të prezantuara në konferenca vendore dhe ndërkombëtare.

Këtë sukses të rëndësishëm akademik, Dr. Safet Rika ia kushton familjes së tij, duke e konsideruar mbështetjen, mirëkuptimin dhe përkrahjen e tyre të vazhdueshme si forcën kryesore që e ka shoqëruar gjatë gjithë rrugëtimit të tij shkencor dhe profesional.

/tvgurra