Trump: Unë di më shumë për gjithçka sesa kushdo tjetër në botë !
Presidenti amerikan Donald Trump ka bërë një sërë deklaratash të forta gjatë një tubimi elektoral në Ohio, ku lavdëroi administratën e tij, foli për aftësitë e veta dhe u bëri votuesve disa premtime në prag të zgjedhjeve të mesmandatit.
Gjatë fjalimit, Trump deklaroi se është “një person me inteligjencë shumë të lartë” dhe se ka një nga rezultatet më të larta të IQ-së në botë. Ai tha gjithashtu se di më shumë për inflacionin dhe “për gjithçka” se kushdo tjetër në sallë dhe, sipas tij, pothuajse kushdo tjetër në botë.
Trump u shpreh gjithashtu se SHBA-ja po shënon aq shumë suksese sa ai nuk mund ta “përballojë” më fitoren. “Po fitojmë shumë”, deklaroi presidenti gjatë tubimit, transmeton Telegrafi.
Një nga deklaratat kryesore të Trumpit ishte premtimi për një pagesë prej 5 mijë dollarësh për çdo qytetar të rritur amerikan, nëse republikanët fitojnë kontrollin e Dhomës së Përfaqësuesve dhe Senatit në zgjedhjet e 3 nëntorit.
“Do t’u jap 5 mijë dollarë çdo qytetari të rritur në Amerikë”, deklaroi Trump, duke e lidhur premtimin me të ardhurat që administrata e tij thotë se po mbledh nga tarifat doganore.
Trump paralajmëroi në të njëjtën kohë se një fitore e demokratëve do ta çonte, sipas tij, SHBA-në drejt një depresioni ekonomik të ngjashëm me atë të vitit 1929.
Premtimi për pagesën prej 5 mijë dollarësh është bërë tashmë disa herë nga presidenti gjatë fushatës për zgjedhjet e mesmandatit.
Presidenti amerikan tha gjithashtu se synon të kërkojë miratimin e legjislacionit që do të parashikonte dënimin me vdekje për trafikantët e mëdhenj të drogës, trafikantët e qenieve njerëzore dhe personat që vrasin policë.
“Do të miratojmë dënimin me vdekje për trafikantët e mëdhenj të drogës, trafikantët e qenieve njerëzore dhe këdo që vret një polic”, tha Trump gjatë fjalimit.
Ai njoftoi gjithashtu se administrata e tij po punon për masa të tjera në fushën e sigurisë dhe kontrollit të kufirit, duke përfshirë legjislacionin që, sipas tij, do të kufizonte mundësinë e presidentëve amerikanë për të hapur kufijtë ndaj emigracionit të paligjshëm.
Fjalimi i Trumpit ishte i orientuar kryesisht drejt mobilizimit të votuesve republikanë për zgjedhjet e mesmandatit të 3 nëntorit, në të cilat kontrolli i Kongresit është në garë.
Presidenti ka vazhduar të argumentojë se një fitore republikane do t’i mundësonte administratës së tij të zbatonte më shpejt politikat ekonomike dhe të sigurisë që ai ka premtuar.
Në fjalimin e tij, Trump sulmoi ashpër demokratët, duke i përshkruar me gjuhë fyese dhe duke i akuzuar se do të dëmtonin ekonominë amerikane nëse rikthehen në shumicë.
Ndërkohë, ai ka kundërshtuar edhe sondazhet që tregojnë nivele të ulëta të miratimit të punës së tij përpara zgjedhjeve, duke i cilësuar rezultatet negative si “të rreme”.
Deklaratat e fundit tregojnë se Trump po e përdor periudhën e fundit para zgjedhjeve për të përforcuar mesazhin ekonomik dhe atë të sigurisë, ndërsa u kërkon votuesve të mbështesin kandidatët republikanë për Dhomën e Përfaqësuesve dhe Senatin.
/ts
